අනුර පිටියට බහිද්දී
සජිත් හතර දෙනාගේ කල්ලිය හදයි
දකුණු අප්රිකාවේ කළු ජාතිකයන්ට බලය ලැබිණි. ඒ සමගම ඔවුන් කරන්නට උත්සාහ කළ එක් තීරණාත්මක වැඩක් විය. ඒ, එතෙක් සුදු ජාතිකයන්ගේ ආධිපත්යය යටතේ තිබූ ස්ප්රින්ග්බොක් රග්බි කණ්ඩායමේ බලය තමන් අතට ගැනීම ය. ඊට පෙර මුළු කණ්ඩායමේ ම සිටියේ එක් කළු ජාතික ක්රීඩකයෙක් පමණි. ඒ චෙස්ටර් ය.
පිරිස මේ වැඩේ කරන්නට යන විට කීර්තිමත් ජනාධිපතිවරයා, නෙල්සන් මැන්ඩෙලා ඉදිරියට ආවේය. ඔහු මෙසේ කීවේය.
‘ජනතාව මාව තමන්ගෙ නායකයා හැටියට පත්කළා. දැන් එහෙනම් මට ඒ නායකත්වය සපයන්න ඉඩදෙන්න.’
එසේ කී මැන්ඩෙලා පෙර තිබූ ස්ප්රින්ග්බොක් කණ්ඩායම තව-තවත් දිරිගැන්වීය. ඔහු කණ්ඩායම සමග ලෝක ශූරතාව දක්වා ම සිටියේය. ඔවුහු ලෝක ශූරතාව දිනූහ.
මේ කතාව නිකම්ම කතාවක් නොවේ. අමාත්යංශ ලේකම්වරුන් පිරිසක් අතර වූ කතාවකි. ජනාධිපති අනුර කුමාර දිසානායකගේ ඇතැම් තීරණ සහ පත්වීම් පිළිබඳ විවේචනයක් ද සහිත ව මේ කතාව සිදුවූයේ පසුගිය බදාදා ය. එහිදී නීතියට සම්බන්ධ අමාත්යංශ ලේකම්වරයෙක් ය, ඉහත කතාව කිව්වේ.
‘මේක ක්ලින්ට් ඊස්ට්වුඩ්ගෙ ඉන්වික්ටස් ෆිල්ම් එකේ ලස්සනට තියෙනවා. ඒක කළේ මැන්ඩෙලා ගැන.’
ඔහු තමන්ගේ කතාව තවත් බර කළේ එසේ ය.
‘ඒත් ජනාධිපතිතුමාටත් නොපෙනෙන පැති තියෙන්න පුළුවන්.’
‘ඒක ඇත්ත. ඒවා පෙන්නලා දෙන්න ඕනෙ. ඒ වගේම එතුමට වැඩේ කරගෙන යන්න දෙන්නත් ඕනෙ.’
එදා කොරෝනා ෂෝ දැන් බස් ෂෝ
මෙහිදී විශේෂයෙන් කතා වූ මාතෘකා දෙකක් වූයේ බස් සහ රොහින්ග්යාවරුන් ය. අනතුරුදායක ලෙස සවිකර ඇති කොටස් බස් සහ ත්රීරෝද රථවලින් ගැලවීමේ වැඩේ කරන්නේ පොලිසියයි. පොලිසිය මෙහිදී තමන්ගේ වැඩෙත් එක්කම මාධ්ය සමග නාට්ය පෙන්වීම ගැන ද මෙහිදී අවධානය යොමුවිය.
‘කොරෝනා කාලෙ පීඑච්අයි මහත්තුරු, ඩොක්ටර්ස්ලා මීඩියා එක්ක ගියා. ඒකට ලොකු විරෝධයක් ආවට පස්සෙ නැවතුණා.’
‘ඒත් බස්වල ඔය වගේ වීඩියෝ පෙන්නුවෙ නැත්නම් ඕවා කරන්නත් බෑ.’
‘පෙන්නුවට කමක් නෑ, ඩ්රයිවර්ලා, කොන්දොස්තරලා අපහසුතාවට පත්නොකර. නැත්නම් වෙන්නෙ ඒ මිනිස්සු වෛර බැඳගන්න එක. ඕවා ඔක්කොම අවසානෙට යන්නෙ ආණ්ඩුව පිටින්.’
ඒ වෙලාවේ එහි සිටි අමාත්යංශ ලේකම්වරයකු පොලිසියේ ඉහළ නිලධාරියකුට දුරකතන ඇමතුමක් ගත්තේ මේ වැඩේ ගැන අහන්නට ය. ඔහු පිරිසට කියූ ආකාරයට මේ වැඩේ කරන්නේ එක් ජ්යෙෂ්ඨ නියෝජ්ය පොලිස්පතිවරයකුගේ වුවමනාවට ය.
‘කොළඹ කලර් ලයිට්ස් ඕෆ් කරගෙන පොලිසියෙ අය පාරට දාගෙන ට්රැෆික් වැඩි කරන තීරණයත් එයාගෙලු.’
කොහොම වුණත් මේ කතාබහේදී කියැවුණු එක් දෙයක් අතිශය වැදගත් ය. ඒ, ‘ඔක්කොම අවසානෙට යන්නෙ ආණ්ඩුවෙ ගිණුමට’ කියන එක ය. යකඩය අවශ්ය පරිදි සකස් කරගැනීමට ඉඩ ඇතත්, ඊට උඩ පැන-පැන තළන්නට ඉඩදුන්නහොත් සිදුවන්නේ යකඩයෙන් අවශ්ය වැඩේ ගත නොහැකි වීම ය. මුළු වැඩේ ම නාස්ති වී යෑම ය.
සජබය තීරණාත්මක ගමනක් අරඹයි
සජිත් ප්රේමදාස අන්තිමට තීරණයක් ගත්තේය. පසුගිය කාලයේ සජිත්ට සමගි ජන බලවේගය ඇතුළෙන් චෝදනාවක් ආවේය. එය ඇතුළෙන් පමණක් නොව එළියෙන් ද එන්නට පටන් ගත්තේ හිතපු නැති තරම් වේගයෙනි. ඒ, සජිත් තනි තීරණ ගන්නා බවත්, අනෙක් අයගේ මතයට ඉඩනොදෙන බවටත් ය.
මේක හැදුණු විදිහක් ද තිබේ. සජිත් ඇතැම් තීරණ ගන්නට රැස්වීම් කැදෙව්වද, ඒවාට සමගි ජන බලවේගයේ ජ්යෙෂ්ඨයන් සහභාගි වූයේ අඩුවෙනි. පැමිණි තරුණයන් වැඩිය කතා කළේ නැත. මේ නිසා හුඟක් ඒවා සජිත්ගේ තනි තීරණ විය. මේ ගැන පක්ෂයේ සභාපති ඉමිතියාස් බාකිර් මාකර් සැර ලිපියක් ලිව්වේය. පක්ෂයේ අභ්යන්තර ප්රජාතන්ත්රවාදය ගැන, ඉදිරියට කළ යුත්තේ කුමක්ද යන්න, පක්ෂය පුළුල් ලෙස ප්රතිසංවිධානය කළ යුතු බව ආදී වශයෙන් යෝජනා රැසක් එහි විය. ඒ ලිපියේ කරුණු උපුටා දක්වමින් අපි මීට සති දෙකකට පෙර මේ තීරුවේ සමගි ජන බලවේගය ගැන කතා කළේය.
පසුගිය බදාදා රැස්වූ සමගි ජන බලවේගයේ කළමනාකරණ මණ්ඩලය මේ ලිපිය ගැන දීර්ඝ ව කතා කළේය. එහිදී මණ්ඩලයේ සිටි බහුතරයේ අදහස වූයේ මේ ලිපියේ ඇති සියල්ලට එකඟ විය හැකි බවයි. සජිත් තරමක් නිහඬ ව සිටියද, ඔහු ද කිව්වේ ඉමිතියාස් විවෘත ව මේ ගැන කතා කිරීමත්, පක්ෂයේ සියල්ලන්ගේ අවධානය යොමුකිරීමත් ඉතා වැදගත් බවයි. ඉමිතියාස් මේ ලිපිය ලියා තිබුණේ සජිත්ට ය. රංජිත්ට ද එහි පිටපතක් යවා තිබිණි. රංජිත් කියන්නේ සමගි ජන බලවේගයේ මහ ලේකම් රංජිත් මද්දුම බණ්ඩාර ය.
හතරදෙනාගේ කල්ලිය කාලසටහන හදයි
රංජිත් මද්දුම බණ්ඩාර සම්බන්ධයෙන් පක්ෂය ඇතුළේ තිබූ මතය තරමක් වෙනස් වූයේ පසුගිය පාර්ලිමේන්තු මැතිවරණයේ ජාතික ලැයිස්තුවට මුලින්ම තමන්ගේ නම දමාගැනීම නිසා ය. එය කොහොමත් සාකච්ඡා වී තිබූ දෙයකි. එහෙත් ඡන්දයෙන් පසු අනෙක් අය ඒ ගැන කතාකරන්නටත් පෙර ඔහු තමන්ගේ නම මැතිවරණ කොමිසමට යැව්වේය. ඊට ලොකු විරෝධයක් ආවේ නැත. ඒ කලින් ඒ ගැන එකඟතාවක් තිබූ නිසා ය. එහෙත් ඇතුළේ කතාව ටිකක් ගියේය.
මාතෘකාව කළමනාකරණ මණ්ඩල රැස්වීමයි. මෙහිදී ඉමිතියාස්ගේ ලිපියේ සඳහන් කරුණු ක්රියාත්මක කිරීමට හතරදෙනකුගෙන් සමන්විත මණ්ඩලයක් පත්කෙරිණි. රංජිත් මද්දුම බණ්ඩාර, ඉමිතියාස් බාකිර් මාකර්, කබීර් හෂීම් සහ තිස්ස අත්තනායක ඒ මණ්ඩලයට ඇතුළත් වූහ. මණ්ඩලය මුලින්ම ගත් තීරණය වූයේ සෑම සති දෙකකට වරක් ම කළමනාකරණ මණ්ඩලය රැස්වීමටත්, සෑම මාසයකට වරක් ම පක්ෂ කෘත්යාධිකාරි මණ්ඩලය රැස්වීමටත් ය. කොහොම වුණත් පළාත් පාලන ඡන්දය ඉලක්ක කරගෙන වැඩ ගොඩක් කරන්නට සමගි ජන බලවේගය කටයුතු කරමින් සිටී. ඒ අතර ප්රධාන ම දේ වන්නේ එක්සත් ජාතික පක්ෂය එකතු වීම ය. ඊට අදාළ සාකච්ඡා සෑහෙන තරම් සාර්ථක ය. නායකයන් දෙදෙනා තවම ඒ ගැන කතා කරන්නට මුණනොගැසුණත්, කපුකම් සියල්ල ඉදිරියට යයි.
නියෝජ්ය ඇමැතිට නාවික හමුදාව සීමා පනවයි
මියන්මාරයේ සිට ලංකාවට ආ රොහින්ග්යා සරණාගතයන් නාවික හමුදාවේ භාරයට ගත් පසු ඔවුන් මුණගැසුණු මුල් ම කණ්ඩායමේ විදේශ කටයුතු නියෝජ්ය ඇමැති අරුන් හේමචන්ද්ර ද විය. ඔවුන් සමග කතාකිරීම දුෂ්කර වූයේ භාෂා ප්රශ්නය නිසා ය. කෙසේ වෙතත් දෙදෙනකුට පමණක් ඉංග්රීසි භාෂාවෙන් කතා කිරීමට තරමක හැකියාවක් විය. මේ පිරිස අතර අවුරුදු 18ට අඩු ළමුන් 57ක් වූහ. ඔවුන් නාවික හමුදාව භාරයේ සිටියේ භීතියෙනි. අරුන් ඔවුන් සමග සමීපවෙමින් ඔවුන්ගේ බය නැති කිරීමට උත්සාහ කරද්දී, නාවික හමුදාව ඊට සීමා දැම්මේය. ඒ සීමාවලට හේතුව වූයේ ඔවුන්ගේ සෞඛ්ය තත්ත්වය පිළිබඳව නොදැන සිටීමයි. නාවික හමුදාවේ මේ උපදෙස්වලට අරුන් අවනත විය.
ඔහු මේ පිළිබඳව ආණ්ඩුවේ වගකිවයුතු අංශ දැනුවත් කොට ආපසු ආවේය. පිරිස මුලතිව් ගුවන් හමුදා කඳවුරට රැගෙන යෑමට තීරණය කරන ලදි. ත්රීකුණාමලයේ සිට ඔවුන් ගොඩබිමින් මුලතිව් වෙත රැගෙන ගියේ නම්, එය පැය තුනක පමණ ගමනකි. එහෙත් නාවික හමුදාව ඔවුන් රැගෙන ගියේ මුහුදෙනි. එම නිසා ඒ ගමනට පැය හතකටත් වැඩි කාලයක් ගත වී තිබිණි. මේ ගැන විවේචන එල්ල වීම නිසා අරුන් ද නාවික හමුදාවෙන් ඒ ගැන විමසා තිබිණි. ඊට ද නාවික හමුදාව පැත්තෙන් පවසා තිබුණේ සෞඛ්ය තත්ත්වය පිළිබඳව නිශ්චිත අදහසක් නොමැති වීම නිසා එසේ කරන්නට සිදු වූ බවයි.
මේ සරණාගත පිරිස පැමිණීම නිසා ආණ්ඩුවේ මේ විෂය භාර ඇතැමුන් ද නොදැන සිටි කාරණයක් දැනගත හැකි විය. ඒ, දීර්ඝ කාලයක් කොළඹ - 07, වෝඩ් පෙදෙසේ පවත්වාගෙන ගිය එක්සත් ජාතීන්ගේ සරණාගතයන් පිළිබඳ ශ්රී ලංකා කාර්යාලය සම්පූර්ණයෙන් ම වසා දමා ඇති බවයි. දැන් එහි නියෝජිතයන් දෙදෙනකු පමණක් තුම්මුල්ලේ ඇති එක්සත් ජාතීන්ගේ කොළඹ කාර්යාලයේ සිටිති. කෙසේ වෙතත් ඒ ගැන විමසූ අවස්ථාවේ එක්සත් ජාතීන්ගේ පැත්තෙන් පවසා තිබුණේ ලංකාවේ සිටින සමස්ත සරණාගතයන් සංඛ්යාව 459ක් තරම් අඩු අගයක් ගැනීම නිසා මේ තීරණය ගත් බවයි.
අර්ජුන - සංගක්කාර සහ මහේල
ඉන්දීය තානාපති කාර්යාලයේ ආරාධනයෙන් ඔවුන්ගේ විශේෂ සැමරුමකට පසුගිය සතියේ ක්රීඩා ඇමැති සුනිල් කුමාර ගමගේ ද එක් විය. එහිදී ඇමැතිවරයාට විශේෂ පුද්ගලයකු හමුවිය. හමු වූවා කියනවාට වඩා නිවැරදි වන්නේ ඔහු ළඟට ගොස් ඇමැතිවරයා ම කතා කිරීම ය. ඒ, 1996 ලෝක කුසලානය ලංකාවට දිනාදුන් ශ්රී ලංකා ක්රිකට් කණ්ඩායමේ නායකයා වූ, හිටපු ක්රීඩා ඇමැති අර්ජුන රණතුංග ය. අර්ජුන සහ ඇමැතිවරයා සෑහෙන වේලාවක් කතාකරමින් සිටිනු දැකගත හැකි විය. ක්රීඩා ක්ෂේත්රය නගාසිටුවීමට තමන්ගේ පැත්තෙන් ඕනෑම සහායක් දීමට සූදානම් බවක් ද එහිදී අර්ජුන කියා තිබූ අතර, අමාත්යංශය සහ එහි නිලධාරීන් ගැනත්, ක්රීඩා පිටි සහ ක්රීඩා සංගම් ගැනත් දෙදෙනා මෙහිදී කතා කර තිබිණි.
ජනාධිපතිවරයාගේ ප්රධානත්වයෙන් ආරම්භ කෙරුණු ක්ලීන් ශ්රී ලංකා වැඩසටහනේ ආරම්භක උත්සවයට කුමාර් සංගක්කාරට සහ මහේල ජයවර්ධනට ද ආරාධනා කර තිබිණි. ඔවුන් දෙදෙනා සමග අදහස් හුවමාරු කරගැනීමේදී ජනාධිපතිවරයා ඉල්ලීමක් කර තිබිණි. ඒ, වැඩේට සහයෝගය ලබාදෙන ලෙසයි. අර්ජුන වගේම සංගක්කාර, ජයවර්ධන දෙදෙනා ද ඊට යහපත් ප්රතිචාර දක්වා ඇත. ඒ අනුව ක්ලීන් ශ්රී ලංකා හි වගකීම් කිහිපයක් ද ඉදිරියේදී ඔවුන්ට ලැබීමට නියමිත බව වාර්තා වේ.
ජූලි යන්න කලින් උපදෙස් දෙන්න යයි
ශ්රී ලංකාවේ ඇමෙරිකා තානාපති ජූලි චන්ග් සිය ධුර කාලය අවසන් කර සිය රට බලා යෑමට නියමිත ය. ඇය පසුගිය බදාදා පස්වරුයේ ඉලංගෙයි තමිල් අරසු කච්චි පක්ෂයේ පාර්ලිමේන්තු මන්ත්රීවරුන් සමග සාකච්ඡාවක් පැවැත්වූවාය. ලංකාවේ සිදු වූ අපරාධ සම්බන්ධයෙන් යුක්තිය ඉටුකර ගැනීමේ වැදගත්කමත්, ලංකාවේ ජනතාවට ඇමෙරිකාවෙන් ලබාදෙන සහාය දිගටම ලබාදීම පිළිබඳවත් මෙහිදී වැඩියෙන් සාකච්ඡා කර තිබිණි. එසේම උතුරු පළාතේ ජනතාවට විශේෂ වන ප්රශ්න සම්බන්ධයෙන් මෙන්ම ඉලංගෙයි තමිල් අරසු කච්චි පක්ෂයේ අනාගත දේශපාලන සැලසුම් පිළිබඳව ද මෙහිදී දෙපාර්ශ්වය අදහස් හුවමාරු කරගෙන තිබිණි.
ජූලිගේ සාකච්ඡාව ගැන කියූ නිසා ඊට ද අදාළ වන තවත් දෙයක් කිව යුතුය. ඒ උතුරේ ඉඩම් ප්රශ්නය ගැන ය. ඉලංගෙයි තමිල් අරසු කච්චි පක්ෂයේ පාර්ලිමේන්තු මන්ත්රීවරුන් ජූලිට ද මේ ගැන කියා තිබිණි. එහිදී ජූලි කියා තිබුණේ ජාතික ජන බලවේග ආණ්ඩුව ඒ සම්බන්ධයෙන් පැහැදිලි ස්ථාවරයක් දරන බව පෙනෙන්නට ඇති බවයි. මේ ගැන අදහස් දක්වමින් ජනාධිපතිවරයා පසුගිය දිනෙක පවසා තිබුණේ මෙසේ ය.
‘උතුරේ ජනතාවගේ ඉඩම් නිසි ක්රමවේදයකින් තොරව රජයේ ආයතන පවරාගෙන තියෙනවා නම්, ඒවා අනිවාර්යෙන්ම ඒ ජනතාවට දෙන්න ඕනෙ. ලංකාවෙ ඉඩම් කියන්නෙ දේපොළක් විතරක් නෙමෙයි, ඥාතීත්වයක්.’
ජනාධිපතිවරයාගේ මේ ප්රකාශය උතුරේ සියලු ප්රවෘත්ති වෙබ්අඩවි සිය ප්රධාන පුවත ලෙස ගෙන තිබූ අතර, ඒ පිළිබඳව ජනතාවගේ අදහස් විමසීමට ද ඔවුන් කටයුතු කර තිබිණි. ජනාධිපතිවරණයේදී උතුරේ ජනතාව ජාතික ජන බලවේගයට ඡන්දය දුන්නාට වඩා වැඩි ප්රතිශතයක් පාර්ලිමේන්තු මැතිවරණයේදී ඡන්දය දී තිබිණි. පාර්ලිමේන්තු මැතිවරණයට පෙර සිදු වූ අනතුරක් සම්බන්ධයෙන් පොලිසිය ක්රියා කර තිබූ ආකාරය දැඩි විවේචනයට ලක් විය. පොලිසියේ නිලධාරියකුගේ යතුරුපැදියක් අතුරු මාර්ගයකින් එක්වරම ප්රධනා මාර්ගයකට දැමීම අනතුරට හේතු වී තිබිණි. එහිදී නීත්යනුකූල නොවන ලෙස කටයුතු කළ පොලිස් නිලධාරීන් මාරු කිරීමට වැඩ බලන පොලිස්පතිවරයා කටයුතු කළ අතර, ඒ පිළිබඳ වෙනම විමර්ශනයක් ද පැවැත්වීමට කටයුතු කළේය. මේ ගැන ද උතුරේ මාධ්ය වෙනම කතා කර තිබුණේ ජනාධිපතිවරයාගේ ඉඩම් කතාව ගැන කතා කළා වගේ ය.
ජනාධිපති ළඟ මොකුත් ප්රශ්න නැත
පොලිසිය සම්බන්ධයෙන් ලියූ නිසා පොලිසියේ ප්රශ්නයක් ද ලිවිය යුතුය. වැඩ බලන පොලිස්පති සහ පොලිස් දෙපාර්තමේන්තුවේ දෙවැනියා වන ජ්යෙෂ්ඨ නියෝජ්ය පොලිස්පති (පරිපාලන) අතර පැවැති සීතල යුද්ධය දැන් එළියට ම පැමිණ ඇත. ඊට හේතු වී ඇත්තේ ජ්යෙෂ්ඨත්වය පිළිබඳ ප්රශ්නයක් බව ආරංචි ය. වැඩ බලන පොලිස්පති ප්රියන්ත වීරසූරියට වඩා දෙවැනියා වන ජ්යෙෂ්ඨ නියෝජ්ය පොලිස්පති ලලිත් පතිනායක ජ්යෙෂ්ඨ ය. එහෙත් වීරසූරිය 2027දී විශ්රාම යන්නේය. පතිනායක විශ්රාම යන්නේ 2032දී ය. ඊට හේතුව වීරසූරිය උප පොලිස් පරීක්ෂකවරයකු ලෙස පොලිසියට එක් වූ අයකු වීමත්, පතිනායක සහකාර පොලිස් අධිකාරිවරයකු ලෙස පොලිසියට එක් වූ අයකු වීමත් ය. උප පොලිස් පරීක්ෂකවරයකු ලෙස පොලිසියට එක් වූ අයකු මීට පෙර පොලිස්පති ධුරයට පත් කර නැත.
පතිනායක තමන්ගේ උපදෙස් පිළිනොපදින බවක් පොලිස්පතිවරයාගේ පැත්තෙන් මහජන ආරක්ෂක අමාත්යංශයට කියා ඇත. වීරසූරිය තමන්ට වඩා කණිෂ්ඨ බව පතිනායකගේ පැත්තෙන් පොලිස් කොමිසමට කියා ඇත. කෙසේ වෙතත් පසුගිය දිනෙක ජනාධිපතිවරයාගේ ප්රධානත්වයෙන් පොලිසියේ ඉහළ නිලධාරීන් සියල්ල කැඳවා අපරාධ විමර්ශන පිළිබඳ කතා කර තිබිණි. එහිදී දෙදෙනාම කිසිදු ගැටලුවක් පෙන්වා තිබුණේ නැත.
මේ අපරාධ සාකච්ඡාවෙන් පසුව ය, ජනාධිපතිවරයා නීතිපතිවරයා ඇතුළු නීතිපති දෙපාර්තමේන්තුවේ ප්රධානීන් ගෙන්වා සාකච්ඡාවක් පවත්වා තිබුණේ. එහිදී නීතිපතිවරයාගේ පැත්තෙන් කියා තිබුණේ පොලිසියෙන් එවන විමර්ශන ලිපිගොනු අඩුපාඩු ඇති බවයි. ඒවාට චෝදනා ගොනු කළ නොහැකි බවයි. පොලිසිය පැත්තෙන් කියා තිබුණේ නීතිපති දෙපාර්තමේන්තුව විමර්ශන ලිපිගොනුවලට අදාළ උපදෙස් ලබාදීම ප්රමාද කරන බවයි. කණ්ඩායම් දෙක වෙන-වෙනම ගෙන්වූ ජනාධිපතිවරයා, මේ සතියේදී කණ්ඩායම් දෙකේ ප්රධානීන් එකට ගෙන්වා සාකච්ඡා කිරීමට ද නියමිත බව වාර්තා වේ.
දිනෙන්-දින පරිණත වන නාමල්
මේ දිනවල ශ්රී ලංකා පොදුජන පෙරමුණ යනු නාමල් රාජපක්ෂ බවට පත්වී තිබේ. නාමල් සියලු දේ ගැන කතා කරයි. නාමල් සියලු සාකච්ඡාවලට යයි. නාමල් සියල්ලන් මුණගැසෙයි. නාමල් ජනතාවගේ සෑම ප්රශ්නයක් ගැන ම ට්විටර් සමාජ මාධ්ය පිටුවේ පණිවුඩ ලියයි. දේශපාලන ක්ෂේත්රයේ කතාවෙන්නේ නාමල් දැන් පරිණත වෙමින් පවතින බවත්, ඔහු හොඳ ගමනක් යනු ඇති බවත් ය. බස් ප්රශ්නය ගැනත් නාමල් සිකුරාදා කතා කර තිබිණි. ඔහු කියා තිබුණේ තමන්ගේ වාහනය තරමක් ලස්සන කරගන්නට ඉඩක් තිබිය යුතු බවයි. අනතුරක් නොවන පරිදි එය සිදුකරගැනීම ජනතාවගේ වගකීමක් වුවද, සියලු සැරසිලි කොටස් ගැලවීම අනුමත කළ නොහැකි බව ද ඔහු කියා තිබිණි.
කෙසේ වෙතත් නාමල්ට ඉදිරියේදී එන්නේ හොඳ කාලයක් නොවන බවත් පැහැදිලි ය. ඔහුගේ නමත් පැටළී ඇති ආන්දෝලනාත්මක ක්රිෂ් ගනුදෙනුවට අදාළ විමර්ශන කඩිනම් කර තිබේ. වසීම් තාජුඩීන් ඝාතන විමර්ශන සම්බන්ධයෙන් නාමල්ගේ මව වන ශිරන්ති රාජපක්ෂ අපරාධ පරීක්ෂණ දෙපාර්තමේන්තුවට කැඳවීමට නියමිත ය. යෝෂිත ද එම දෙපාර්තමේන්තුවට කැඳවූවේය. ඒ අතර නාමල්ගේ නීතිඥ උපාධිය ගැන ද ප්රශ්න කරයි. ඒ ගැන පොලිසියට, නීති විද්යාලයේ පාලනාධිකාරියට පැමිණිලි කළ නීති ශිෂ්යයා ලංකාවට එන බවක් ද කියා තිබිණි.
2015 සුන් වූ බලාපොරොත්තුව යළිත්
2009 ජනවාරි 08 වැනිදා ඝාතනයට ලක්වූ මාධ්යවේදී ලසන්ත වික්රමතුංග ස්මරණය කිරීම පසුගිය බදාදා බොරැල්ල කනත්තේදී පැවැත්විණි. එහිදී ඔහුගේ චරිතාපදානය ලියූ රේන් වික්රමතුංග කිව්වේ වර්තමාන ආණ්ඩුව ලසන්තගේ ඝාතන විමර්ශනය විධිමත්ව පවත්වනු ඇති බවයි. එහෙත් එහි සිටි බහුතරයක් කිව්වේ 2015 යහපාලන ආණ්ඩුව පැමිණි අවස්ථාවේ ද එවැනි බලාපොරොත්තුවක් තිබූ බවයි. එහෙත් ඒ බලාපොරොත්තු ඒ ආණ්ඩුව නැති කළ බවයි.
ලසන්ත වික්රමතුංග ඝාතනය කළ හෝ ඝාතනයට අනුබල දුන් කිසිවකු මෙතෙක් අත්අඩංගුවට ගෙන නැත. අත්අඩංගුවට ගෙන තිබුණේ සාක්ෂි වසන් කළ කිහිපදෙනකු පමණි. වැඩක් එක දිගට කරන්නේ කෙසේද යන්න ලසන්ත ආන්දෝලනාත්මක මිග් ගනුදෙනුව ගැන කළ අනාවරණ පිළිබඳව බැලීමෙන් පැහැදිලි වේ. 2007 ජූලි 15, ජූලි 29, අගෝස්තු 02, සැප්තැම්බර් 05, නොවැම්බර් 09 මේ ආදී වශයෙන් එම ගනුදෙනුව පිළිබඳව ලසන්ත එකදිගට ලිව්වේය. ගෝඨාභය රාජපක්ෂ තමන් ගැන ලියන්න එපා යැයි අධිකරණයෙන් වාරණයක් ගන්නා තුරු ම ලිව්වේය.
‘මට කොහෙද ඕවට වෙලාවක්?’
රනිල් වික්රමසිංහ සිය ඉන්දීය - නේපාල සංචාර අවසන් කර පැමිණීමෙන් පසු ඔහුගේ සමීපතම නීතිඥ පිරිසක් ඔහු හමු වී තිබිණි. ආණ්ඩුව පවතින නීති රැසක් වෙනස් කිරීමට අදාළ නීති කෙටුම්පත් සකස් කිරීමට කටයුතු කරමින් සිටි බව මෙහිදී එම නීතිඥයන් හිටපු ජනාධිපතිවරයාට පෙන්වා දී ඇත.
‘ඒක හොඳයි. මේ සමහර ඒවා අනිවාර්යෙන්ම වෙනස් වෙන්න ඕනෙ. මට කොහෙද ඕවා කරන්න වෙලාවක් තිබුණෙ, මට තිබුණෙ ඉතින් ආර්ථික ප්රශ්නනෙ.’
රනිල් ඔවුන්ට පිළිතුරු ලබාදී තිබුණේ එසේ ය. සජිත් - රනිල් එකතුව ගැනත් කතා කිරීමෙන් පසු, රනිල් ඔවුන්ට කියා තිබුණේ ‘මට ටිකක් ඇවිදින්න ඕනෙ’ යනුවෙනි. රනිල් තවත් සංචාරයක් සඳහා කඩිනමින් ලංකාවෙන් පිටත්වීමට නියමිතව ඇත. කෙසේ වෙතත් රනිල්ට විරුද්ධව නඩු පෝලිමක් ද එන්නට නියමිත බව ආරංචි ය.
