ශ්‍රේෂ්ඨාධිකරණයෙන් ජනාධිපති ළඟටත් ගොස්

සතිය වෙනස් කළ

සීසර්ගේ බිරිඳ !

ලංකාවෙන් එළියට ගොස් නැවතත් ලංකාවට පැමිණිය යුතුය. ඒ මෙහෙම ය. වැඩේ පටන්ගත යුත්තේ අල්ලස් කොමිසමෙන් ය. අල්ලස් කොමිසම පසුගිය 09 වැනිදා දූෂණ විරෝධී දිනය සැමරුවේය. එහි ප්‍රධාන ආරාධිතයා වූයේ ජනාධිපති අනුර කුමාර දිසානායක ය. අනුර එහිදී කොමිසමේ ක්‍රියාකාරිත්වය ගැන, රටේ සිද්ධ වුණු දේවල් ගැන, ඒවාට දැමූ නඩුවලට වුණු දේවල් ගැන සැරට කතා කළේය. 

එතැන්ට යන්නට පෙර ඇමෙරිකාවට යා යුතුය. ලබන ජනවාරියේදී එරට තේරීපත්වූ ජනාධිපති ඩොනල්ඩ් ට්‍රම්ප්ගේ දිවුරුම් දීමේ උත්සවය පැවැත්වීමට නියමිත ය. මේ උත්සවය සඳහා සකර්බර්ග් ඇමෙරිකානු ඩොලර් මිලියනයක් පරිත්‍යාග කර තිබේ. ෆේස්බුක්, වට්සැප්, ඉන්ස්ටර්ග්‍රෑම් යන සමාජ මාධ්‍ය වේදිකාවල මව් සමාගම වන්නේ මෙටා සමාගමයි. මෙටා සමාගමේ ප්‍රකාශකයෙක් උපුටා දක්වමින් රොයිටර් පුවත් සේවය මේ බව තහවුරු කරයි. මේ වැඩේ තවත් විශේෂත්වයක් ඇත.

මෙටා සමාගම පවත්වාගෙන ආ පරණ පුරුද්දක් තිබිණි. ඒ, මෙවැනි වැඩ නොකිරීම ය. වෝල් ස්ටී්‍රට් ජර්නල් පුවත්පත ඒ බව පැහැදිලිව පවසා තිබිණි. ඇමෙරිකාවේ ජනාධිපති ධුරය සඳහා ඩිමොක්‍රටික් පක්ෂයෙන් මුලින් ඉදිරිපත් වූයේ ජෝ බයිඩ්න් ය. ඉන්පසු බයිඩ්න් ඉවත් වී කමලා හැරිස් ආවාය. ඇමෙරිකාවේ ප්‍රමුඛ පෙළේ සමාගම් දෙපැත්තට බෙදී අපේක්ෂකයන් දෙදෙනාට සහාය දීමට කටයුත් කරද්දී, සකර්බර්ග් ප්‍රසිද්ධියේ කිව්වේ මෙසේ ය.

‘මම ට්‍රම්ප්ට හෝ හැරිස්ට සහාය දෙන්නෙ නෑ. මගේ ස්ථාවරය වෙනස් කරන්නෙ නෑ.’

සකර්බර්ග් වගේ අපේ අය මතක් කරගන්න 

එසේ කියූ සකර්බර්ග් ය, මේ විදිහට ට්‍රම්ප්ගේ දිවුරුම් දීමේ උත්සවයට ඩොලර් මිලියනයක් දෙන්නේ. මේ මුදල් වැඩේට තවත් හේතුවක් බලපෑවේය. ලෝකයේ ධනවතුන්ගේ ලැයිස්තුවේ පළමු ස්ථානයේ සිටින්නේ එලෝන් මස්ක් ය. ඒ ෆෝර්බ්ස් සඟරාව වාර්ෂිකව හදන ලැයිස්තුවට අනුව ය. එහි සකර්බර්ග්ට හිමි වී ඇත්තේ සිව්වැනි ස්ථානයයි. මස්ක් මේ වන විට ට්‍රම්ප්ගේ ආණ්ඩුවේ තනතුරක් ද දරයි. ඔහු සෘජුව දිගටම ට්‍රම්ප් වෙනුවෙන් පෙනීසිටියේය. මෙසේ ට්‍රම්ප් වෙනුවෙන් පෙනී සිටි ව්‍යාපාරිකයෝ දිගටම ඉහළට ආහ. ඒ අතරවාරයේ ය, සුප්‍රකට ටයිම් සඟරාව දෙවැනි වරටත් වසරේ පුද්ගලයා ලෙස ට්‍රම්ප් නම් කළේ.

නැවතත් ලංකාවට පැමිණිය යුතුය. පසුගිය කාලයේ ලංකාවේ අල්ලස් නඩු රැසක් ඒ නඩු පැවරූ අල්ලස් කොමිසම මගින් ම ඉල්ලා අස්කරගත්තේය. මේ ගැන මුලින් කියූ දූෂණ විරෝධී සැමරුමේදී ජනාධිපතිවරයා ද අදහස් දක්වා තිබිණි. පසුගිය මැතිවරණවලදී සහ මැතිවරණවලින් පසුව ද ට්‍රම්ප්ට සකර්බර්ග් මුදල් දුන්නා වගේ පරිත්‍යාග රැසක් ගැන කියවිණි. මැතිවරණවල ආදායම් - වියදම් පනතට අනුව ජනාධිපති අපේක්ෂකයන් ඉදිරිපත් කළ තොරතුරු සැකයට භාජනය වී ඇත. පාර්ලිමේන්තු මැතිවරණයට අදාළ ඒ ආදායම් - වියදම් වාර්තා දිය යුතු අවසාන දිනය වූයේ පසුගිය 06 වැනිදා ය. එදින වන විට ඒ වාර්තා නොදුන් පිරිස 800කට අධික ය. දුන් අයගේත් ප්‍රශ්න තිබෙන බව ආරංචි ය.

අල්ලස් නඩුවලට සිද්ධ වුණු දේ

කෙසේ වෙතත් අර කී අල්ලස් නඩු ඉවත් කරගැනීමේදී ක්‍රම දෙකක් පාවිච්චි කර තිබේ. එකක් නම් නැවත නඩු පැවරිය හැකි පරිදි නඩු ඉවත් කරගැනීමයි. අනෙක නම් නැවත නඩු පැවරිය නොහැකි පරිදි නඩු ඉවත් කර ගැනීමයි. ආන්දෝලනාත්මක විනිසුරුවරයකු නීතිපති දෙපාර්තමේන්තුවේ කටයුතු කරන කාලයේදී සිදු කළ විදුලිබල නඩුවකට සම්බන්ධ අල්ලස් නඩුවක් කොමිසමෙන් පවරා තිබිණි. ඒ නඩුව ඉවත් කරගෙන ඇත්තේ නැවත පැවරිය නොහැකි වන ආකාරයට ය. කොමිසමේ කොමසාරිස්වරුන් සියල්ලන්ගේ අත්සනින් නැවත පැවරිය හැකි නඩු වුවද, මෙතෙක් විධිමත්ව පවරා නැත.

දූෂණ විරෝධී දිනයෙන් පසු මෙසේ නැවත නොපැවරූ නඩු ලැයිස්තුවක් ආණ්ඩුවෙන් ලබාගෙන ඇත. ඒ ගැන වැඩ සිදුවන්නේ කෙසේද යන්න දැනට දන්නේ නැත. 

නඩු ගැන කතා කළ නිසා තවත් නඩුවක් ගැන කිව යුතුය. ඒ මාධ්‍යවේදී කීත් නොයාර් පැහැරගෙන ගොස් පහරදීමේ සිදුවීමට අදාළ නඩුවයි. එහි මූලික විමර්ශනවලින් පසු, සියලු විමර්ශන වාර්තා නීතිපති දෙපාර්තමේන්තුවට බාරදී දැන් වසර ගණනාවකි. එහෙත් නීතිපති දෙපාර්තමේන්තුව තවමත් එය අධ්‍යයනය කරමින් සිටී. තවමත් විමර්ශන අංශවලට උපදෙස් එවා නැත. මේ ගැන ද ආණ්ඩුව පැත්තෙන් තොරතුරු ඉල්ලා ඇතැයි වාර්තා වේ.

හදිසියේ මතු වූ සීසර්ගේ බිරිඳගේ කතාව

රෝම අධිරාජ්‍යයේ අධිරාජයා වූ සීසර්ගේ බිරිඳ පොම්පෙයාගේ කතාව එන්නේ ක්‍රිස්තු පූර්ව 67 කතාවක් ලෙස ය. සීසර්ගේ බිරිඳ පොම්පෙයා පිළිබඳ යම් සැකයක් ගැන කටකතාවක් පැතිරිණි. කිසිදු සාක්ෂියක් නැති වුවද, විචිකිච්ඡාවක් විය. මේ විචිකිච්ඡාව හේතුවෙන් පමණක් සීසර් ඇය තමන්ගේ බිරිඳ තනතුරෙන් ඉවත් කළේය. 

පසුගිය බ්‍රහස්පතින්දා සහ සිකුරාදා දින දෙකේ නීති ක්ෂේත්‍රයේ වැඩියෙන්ම කතා වූ මාතෘකාවක් වූයේ මේ සීසර්ගේ බිරිඳගේ කතාවයි. ඊට හේතු වූයේ ශ්‍රේෂ්ඨාධිකරණයේ ජ්‍යෙෂ්ඨත්වයෙන් දෙවැනි විනිසුරුවරයා වන ප්‍රීති පද්මන් සූරසේන ලියූ තීන්දුවක 20 වැනි පිටුවයි. එහි දැක්වුණේ විනිසුරුවරුන් සීසර්ගේ බිරිඳටත් වඩා සැකයක්, විචිකිච්ඡාවක් ඇති නොවන පරිදි කටයුතු කළ යුතු බවකි. හිටපු ජනාධිපති රනිල් වික්‍රමසිංහ විසින් අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න ශ්‍රේෂ්ඨාධිකරණ විනිසුරුවරයකු ලෙස පත්කිරීමට ආණ්ඩුක්‍රම ව්‍යවස්ථා සභාවට කළ නිර්දේශය දෙවරක්ම එම සභාවෙන් ප්‍රතික්ෂේප කිරීමට එරෙහිව ගොනුකළ මූලික අයිතිවාසිකම් පෙත්සමක තීන්දුව ය, මෙසේ ලබාදී තිබුණේ. 

ක්‍රිස්තු වර්ෂ පළමු සියවසේ රෝමයේ ජීවත් වූ ප්‍රකට කවි ජුවෙනාල්ගේ ලතින් කවියක කොටසක් ද මේ තීන්දුවේ ඇත. එහි සරල අදහස වන්නේ ආරක්ෂකයන් තමන් විසින් ම ආරක්ෂා විය යුතු බවත්, ආරක්ෂකයන් ආරක්ෂා කිරීමට කිසිවකු නැති බවත් ය. මෙය විනිසුරුවරුන්ට පමණක් නොව, සියල්ලන්ට අදාළ කතාවකි. අල්ලස් කොමිසමටත් අදාළ ය. ජාතික ජන බලවේග ආණ්ඩුවටත් අදාළ ය.

මේ කතාව පසුගිය සිකුරාදා උදෑසන ජනාධිපති කාර්යාලයේදී ද ඇදිණි. ජනාධිපතිවරයාගේ සමීප නීතිඥයන් පිරිසක් මේ නඩු තීන්දුව ගැනත් කතා කරමින්, ආණ්ඩුවකට එහි ඇති වැදගත්කම ගැන ටිකක් දිගට කතා කළහ. ජනාධිපතිවරයා ද සියල්ලට ඇහුම්කන් දෙමින් ඒ කතාබහට සුළු වේලාවක් සම්බන්ධ වූ අතර, ඒ සුළු වේලාවෙන් පසුව ජනාධිපතිවරයා වාඩි වී තිබුණේ මාධ්‍ය ආයතන ප්‍රධානීන් සමග සාකච්ඡාවකට ය.

කතානායකගේ කතාවෙන් එළියට එන අනෙක් කතා

මේ දිනවල මාධ්‍යවල වැඩියෙන්ම කතාබහට ලක්වන කතාවකි, ආචාර්ය උපාධි යනු. ඒ ගැන පරණ කතාවක් ද ලිවිය යුතුය. හිටපු ජනාධිපති රනිල් වික්‍රමසිංහගේ පරණ උපක්‍රමයක් වූයේ කටකතා යැවීමයි. මෙය දිවංගත මංගල සමරවීර විසින් ද සිදු කර තිබූ බවට ඔහු සමග සිටි පිරිස් සාක්ෂි දරති. වට්සැප් සමූහ වැනි තාක්ෂණික උපක්‍රම නොතිබූ කාලයේ මේ කටකතා සෑහෙන වැඩක් කර තිබිණි. කතානායකවරයාගේ ආචාර්ය උපාධිය ගැන අනිද්දා (17) ඔහු ප්‍රකාශයක් කරන බව පවසා තිබේ. එම නිසා එය මෙහි විසඳීය යුතු නැත. 

ආචාර්ය උපාධි ඇතුළු අනෙකුත් වෘත්තීය සුදුසුකම් ජාතික ජන බලවේග ආණ්ඩුව මැතිවරණ සමයේදී ඉහළට එසවීය. එය ජනතාව පිළිගත්තේය. එම නිසා ජනතාව අතර ඒ පිළිබඳ අවුලක් හැදීමේ සැලැස්මක් ද ක්‍රියාත්මක වී තිබිණි. ඒ අනුව මේ සියල්ලන්ගේ සුදුසුකම් පරීක්ෂා කිරීමේ මෙහෙයුමක් ආරම්භ කර තිබුණේ ඡන්දයට පෙර සිට ය. කතානායකවරයාගේ ප්‍රශ්නය එතැනින් අහුවුණාද කියන්නට දන්නේ නැත. කොහොම වුණත් එහෙම වැඩක් තිබූ බව ලියාතැබීම වටී. හොඳ හොඳ සෙල්ලම් එන්නේ එළිවෙන ජාමෙට ය. එහෙම කියා කිසිවකුට කිසිවකු රැවටීමට අයිතියක් නැත. 

මේ ගැන සමගි ජන බලවේගයේ පාර්ලිමෙන්තු මන්ත්‍රී හර්ෂණ රාජකරුණා පවසා තිබූ කතාව මෙසේ ය. 

‘පාර්ලිමේන්තුවෙ හැමෝම තමන්ගේ අධ්‍යාපන සුදුසුකම් ප්‍රසිද්ධ කරන්න ඕනෙ. මම මගේ සුදුසුකම් ප්‍රසිද්ධ කරනවා. අනෙක් හැමෝමත් එහෙම කරයි කියලා මම බලාපොරොත්තු වෙනවා.’

සිකුරාදා උදෑසන විද්‍යුත් මාධ්‍ය ප්‍රධානීන් සහ ජනාධිපතිවරයා අතර සාකච්ඡාවක් පැවැත්විණි. එහිදී ද ප්‍රධාන මාතෘකාවක් වූයේ මෙයයි. එහිදී ජනාධිපතිවරයා තම ස්ථාවරය පැහැදිලිව කිව්වේ මෙසේය.

‘වැරදි කරන කිසිවෙක්, කිසිම හේතුවකට ආරක්ෂා කරන්න අපේ ආණ්ඩුව සූදානම් නෑ. අපේ ආණ්ඩුව ඇතුළෙ වුණත්, කවර තරාතිරමක කෙනෙක් වුණත් වැරැද්දක් කරනවා නම් ඒ වැරැද්දට එරෙහිව ක්‍රියාමාර්ග ගන්න අපි පැකිළෙන්නෙ නෑ. ඒ සම්බන්ධයෙන් ගත යුතු ක්‍රියාමාර්ග නිවැරදි මොහොතේ ගන්න අපි දෙවරක් කල්පනා කරන්නෙ නෑ.’

ස්වාධීන කොමිෂන් ගැනත් අලුත් සාකච්ඡාවක්

මේ ගැන තවත් හොඳ ම කතාවක් කිව්වේ පසුගිය බදාදා බණ්ඩාරනායක සම්මන්ත්‍රණ ශාලාවේ පැවැති උත්සවයකදී මහාචාර්ය දීපිකා උඩගම ය. ඇය මෙහිදී කතා කළේ ප්‍රජාචාරය හෙවත් සිවික් එඩියුකේෂන් යනුවෙන් භාවිත වන වචනය ගැන ය. ලංකාවේ මේ ප්‍රජාචාරය ඉගැන්වීමේ සීමා ගැනත්, එමගින් උගන්වන අයිතිවාසිකම්, වගකීම්, වගවීම්, සමාජ වටිනාකම් ගැන ඇය කතා කළාය. උපාධි පස්සේ ම නොගොස් අධ්‍යාපනය විධිමත් කරගැනීමේ වැදගතකම් ගැන ඇය මෙහිදී අවධාරණය කළාය.

මේ වැඩේදී ම තවත් වැදගත් දෙයක් එළියට ආවේය. ඒ, ශ්‍රී ලංකා මානව හිමිකම් කොමිෂන් සභාව තම කොමිසමේ බලය වැඩිකර ගැනීම සම්බන්ධයෙන් ආණ්ඩුව සමග සාකච්ඡාවක් ආරම්භ කර ඇති බවයි, ඒ. දැනට මානව හිමිකම් කොමිසමෙන් ලබාදෙන නිර්දේශ රජයේ ආයතන සමහරක් ඉටු නොකරන බවත්, එම නිසා බලය වැඩිකර ගැනීමේ අවශ්‍යතාව මතුවී ඇති බවත් මැතිවරණ කොමිසමේ හිටපු සභාපති, මානව හිමිකම් කොමිසමේ වර්තමාන කොමසාරිස් නීතිඥ නිමල් පුංචිහේවා කිව්වේය. ලංකාව තියෙන්නේ වෙනම තැනක ය. පළාත් පාලන මැතිවරණය නියමිත පරිදි නොපැවැත්වීම පිළිබඳ නඩු තීන්දුවේදී වරදකරු කරන ලද අයෙකි, මේ නිමල් පුංචිහේවා යනු. 

ආරක්ෂක මණ්ඩල රැස්වීමෙන් පසු කතාව වෙනතක යයි

පසුගිය සතියේ පැවැති ආරක්ෂක මණ්ඩල රැස්වීමේදී වැඩි අවධානයක් යොමු වූ කරුණක් වූයේ අධ්‍යාපන අමාත්‍යංශය පිහිටි බත්තරමුල්ල, ඉසුරුපාය ඉදිරිපට පැවැති සංවර්ධන නිලධාරීන්ගේ විරෝධතාවයේදී පිහියක් පාවිච්චි කළ පුද්ගලයා කවුද යන්නයි. ඔහු යුද හමුදා බුද්ධි අංශ සාමාජිකයකු ය යන කතාවත් සමග මෙය තීරණාත්මක වී තිබිණි. මේ දිනවලම ය, යුද හමුදා බුද්ධි අංශයේ ප්‍රධානියා ලෙස කටයුතු කළ බි්‍රගේඩියර් චන්දික මහතන්තිල එම ධුරයෙන් ඉවත් කෙරුණේ. ආරක්ෂක මණ්ඩල රැස්වීමේ සාකච්ඡාවට අනුව පිහියේ වැඩේ කර තිබුණේ බුද්ධි අංශ සාමාජිකයකු නොවේලු. 

කෙසේ වෙතත් මීට අදාළ ව කඩුවෙල මහෙස්ත්‍රාත් අධිකරණයට කරුණු දැක්වීමේදී පොලිසිය මීට බුද්ධි අංශ සම්බන්ධයක් ඇතැයි කියා තිබූ බව මාධ්‍ය වාර්තා කළේය. එය කිව්වාද, නැද්ද යන්න වෙනම කතාවකි. දැන් ඒ ගැනත් සෘජුවම පොලිස්පතිවරයා යටතේ ඇති පොලිස් විශේෂ විමර්ශන ඒකකයෙන් විමර්ශනයක් ආරම්භ කර ඇත. දැන්-දැන් වාර්තා වන ආකාරයට යුද හමුදා බුද්ධි අංශ සාමාජිකයන් සිටි තැනක සිටි අයකු ය, මේ පිහි වැඩේ කර තිබෙන්නේ. ඔහු සිකුරාදා වන විට අත්අඩංගුවට ගැනීමට ද නියමිතව තිබිණි.

10.30 සිට 1.30ට ගතවූ පැය තුන

සමගි ජන සන්ධානයට පාර්ලිමේන්තු මැතිවරණයේදී ලැබුණු මන්ත්‍රී ධුර සංඛ්‍යාව 05කි. එයින් එකක් එම බලවේගයේ මහ ලේකම් රංජිත් මද්දුම බණ්ඩාර ගත්තේය. ඔහුගේ නම ගැසට් කෙරිණි. ඉන්පසු හිරුණිකා ප්‍රේමචන්ද්‍ර, ඩලස් අලහප්පෙරුම ගැන කතා රැසක් තිබිණි. ඒ දෙදෙනා ද මේ ගැන සජිත් ප්‍රේමදාස සජස නායකයා සමග සාකච්ඡා කර තිබිණි. ඒ අතර මනෝ ගනේෂන් වැනි සන්ධානයේ අනෙක් පක්ෂ දිගටම කිව්වේ පොරොන්දු වූ පරිදි අපට ජාතික ලැයිස්තු මන්ත්‍රී ධුරයක් අත්‍යවශ්‍යයි යනුවෙනි. කෙසේ වෙතත් අවසානයේදී ඊට නඩුවක් ගියේය.

මේ සන්ධානයේ සාමාජිකයකු වන ශ්‍රී ලංකා මුස්ලිම් කොංග්‍රසයේ නායක රවුෆ් හකීම් පසුගියදා කොළඹ දිසා අධිකරණයට පැමිණිල්ලක් ගොනුකර තිබිණි. එහි විත්තිකරු ලෙස නම් කර තිබුණේ රංජිත් මද්දුම බණ්ඩාර ය. මේ පැමිණිල්ල සලකා බැලූ කොළඹ දිසා අධිකරණය ශ්‍රී ලංකා මුස්ලිම් කොංග්‍රසයේ මහ ලේකම් නිසාම් කාරියප්පර්ගේ නම ඇතුළත් නොකොට සමගි ජන සන්ධානයේ ජාතික ලැයිස්තුව මැතිවරණ කොමිසමට යැවීම වළක්වමින් වාරණ නියෝගයක් නිකුත් කළේය. ඒ කියන්නේ හකීම්ට වාසි ය. මද්දුම බණ්ඩාරලාට පාඩු ය.

අධිකරණයෙන් මේ වාරණ නියෝගය දුන්නේ බ්‍රහස්පතින්දා පෙරවරු 10.30ට ආසන්න වෙලාවක ය. රංජිත් මද්දුම බණ්ඩාරලා ලැයිස්තුව මැතිවරණ කොමිසමට යැව්වේ එදින පස්වරු 1.30ට ආසන්න වෙලාවක ය. ඒ ලැයිස්තුවේ නිසාම් කාරියප්පර්ගේ නම තිබිණි. එහෙත් රංජිත් මද්දුම බණ්ඩාර මාධ්‍යයට කිව්වේ ‘අපි කොහොමත් එයාව යවන්න තීරණය කරලා තිබුණෙ’ කියලා ය. ඒත් ඇත්ත කතාව නම් නියෝගයෙන් පසු ඒ වැඩේ කිරීම ය. ඒ අනුව සුජීව සේනසිංහ, මනෝ ගනේෂන්, නිසාම් කාරියප්පර්, මොහොම්මදු ඉස්මයිල් මොහොම්මදු මුත්තු සමග රංජිත් මද්දුම බණ්ඩාර අවසානයේදී සමගි ජන සන්ධානය වෙනුවෙන් දස වැනි පාර්ලිමේන්තුව නියෝජනය කරන ජාතික ලැයිස්තු මන්ත්‍රී කණ්ඩායම වූහ.

රනිල්ගේ සමීපතමයන් පැරදවූ ෆයිසර්

අනෙක් පැත්තෙන් මේ වැඩේට පැටළුණේ සිලින්ඩරයයි. රවී කරුණානායක එහි ජාතික ලැයිස්තු මන්ත්‍රීවරයකු ලෙස ගැසට් කෙරිණි. ඉන්පසු ඉතිරි ජාතික ලැයිස්තු මන්ත්‍රී ධුරයට යවන්නේ කවුද යන්න පිළිබඳ සංවාදයක් විය. ඒ තැනට යන්නට වජිර අබේවර්ධන හිටපු ඇමැතිවරයා ද සෑහෙන උත්සාහයක් දැරුවේය. රනිල්ගේ සමීපතමයන් රැසක් ද වජිර යවන්නැයි කීවද, රනිල් පරණ පුරුදු සිනාමුසු මුහුණෙන්ම සිට ඇත. අවසානයේදී එතැන්ට ගියේ ජනාධිපති නීතිඥ ෆයිසර් මුස්තාපා ය. ඒ කියන්නේ ජනාධිපති නීතිඥ ෆායිස් මුස්තාපාගේ පුත්‍රයා ය. ෆායිස් මුස්තාපා කියන්නේ යනු හිටපු ජනාධිපති මෛත්‍රිපාල සිරිසේනගේත්, හිටපු ජනාධිපති මහින්ද රාජපක්ෂගේත් සමීපතමයෙකි. දැන් ඔහුගේ පුතා රනිල්ගේ සමීපතමයන් අබිබවා පාර්ලිමේන්තු ගොස් ඇත.

කොහොම වුණත් ශ්‍රී ලංකා නිදහස් පක්ෂය කියන්නේ ෆයිසර් මුස්තාපා පාර්ලිමේන්තු යැවීමෙන් පසු සිලින්ඩරය සමග ඇති සියලු ඇයි-හොඳයිකම් නවත්වන බවයි. ඉදිරි පළාත් පාලන මැතිවරණයට පුටුව ලකුණින් ඉදිරිපත් වීමට ද ශ්‍රී ලංකා නිදහස් පක්ෂය තීරණයක් ගෙන ඇත. පුටුව යනු ශ්‍රී ලංකා පොදුජන එක්සත් පෙරමුණේ ලකුණයි. එහි ලේකම්වරයා ලෙස සිටියේ හිටපු අගමැති දි.මු. ජයරත්නයි. දැන් ලසන්ත අලගියවන්න එම තනතුරේ සිටී.

සාගරලා එක පැත්තක - නාමල් තව පැත්තක

කතානායක කතාවත් සමග පොදුජන පෙරමුණ විශ්වාස භංගයක් ගෙන ඒමට සූදානම් වන බව එම පක්ෂයේ ලේකම් සාගර කාරියවසම් පවසද්දී, නාමල් රාජපක්ෂ සිටින්නේ වෙනත් වැඩක ය. ඔහු පසුගිය සති කිහිපය පුරා ම මේ වැඩේ සමග සිටි අතර සිකුරාදා දිනයේ ඔහු තමන්ගේ මේ වැඩේ ගැන එක්ස් පණිවුඩයක් ද තබා තිබිණි.

එහි දැක්වුණේ යුද්ධයේ පීඩාවන් තවදුරටත් ලංකාවේ තරුණයන්ට දැනෙන්නට ඉඩ නොදිය යුතු බවයි. එම නිසා ඉන්දියාවේ සිටින දෙමළ තරුණයන්ට ලංකාවට පැමිණීමටත්, ඔවුන්ගේ පවුල් සමග එක්වීමටත් අවශ්‍ය පහසුකම් සපයන්නට ආණ්ඩුව මැදිහත් විය යුතු බවත්, ඒ සඳහා අවශ්‍ය ඕනෑම සහායක් ආණ්ඩුවට ලබාදීමට තමන් සූදානම් බවත් නාමල් රාජපක්ෂ කියයි. මෙවැනි ප්‍රශ්නවලට මුහුණ පා ඇති උතුරේ දෙමළ තරුණයන් මුණගැසීමට ද නාමල් පසුගිය කාලයේ කටයුතු කර තිබිණි.

එසේ ම ලංකාවේ ඉන්දීය මහ කොමසාරිස් කාර්යාලය සමග ද ඒ ගැන සාකච්ඡාවකට නාමල් සහභාගි වී ඇති අතර, නාමල්ගේ සමීපතමයන් පිරිසක් මේ ගැන සොයාබලන්නට ඉන්දියාවට යෑමට සූදානමින් සිටින බවක් ද ආරංචි ය. ඒ කියන්නේ සාගර කාරියවසම්ලා වෙන වැඩක් කරද්දී නාමල් රාජපක්ෂ ඉන්නේ වෙන වැඩක ය.