ආණ්ඩුව කලබල කළ

ජ්‍යෙෂ්ඨයාගේ කෝල් එක !

1885 වසරින් පසු ඒ වැඩේ කරන්නට සමත් වූයේ ඩොනල්ඩ් ට්‍රම්ප් ය. 1885දී ඇමෙරිකා එක්සත් ජනපදයේ ජනාධිපති ධුරයට පත්වූයේ ඩිමොක්‍රටික් පක්ෂයේ ස්ටීවන් ග්‍රෝවර් ක්ලෙව්ලෑන්ඩ් ය. 1889 ජනාධිපතිවරණයෙන් ඔහු පරාජයට පත්වූ අතර, එහෙත් නැවත 1893දී ඔහු ජනාධිපති ධුරයට පත්විය. ට්‍රම්ප් ද 2016දී ජනාධිපති විය. ඒත් ඒ වෙලාවේ ඔහුගේ ප්‍රතිවාදියා වූ හිලරි ක්ලින්ටන් ට්‍රම්ප්ට වඩා ඡන්ද ලක්ෂ 29ක් වැඩියෙන් ගත්තේය. ඇමෙරිකාවේ තිබෙන මැතිවරණ ක්‍රමය අනුව ජනාධිපති වූයේ ට්‍රම්ප් ය. මේ වැඩේ ම 2000 අවුරුද්දේ දී ද සිදු විය. ජෝර්ජ් ඩබ්ලිව් බුෂ් ජනාධිපත් වුවද, ඔහුගේ ප්‍රතිවාදියා වූ අල් ගෝර් ඡන්ද ලක්ෂ 6කට වඩා වැඩියෙන් ගත්තේය. 

කෙහොම වුණත් 2020දී ජෝ බයිඩ්න්ට පැරදුණු ට්‍රම්ප්, යළිත් 2024දී දිනුවේය. හරියටම 1893දී ක්ලෙව්ලෑන්ඩ් වගේ ම ය. දැන් ඇමෙරිකා එක්සත් ජනපදයේ 47 වැනි ජනාධිපති ට්‍රම්ප් ය. ට්්‍රම්ප්ගේ ආණ්ඩුවේ රාජ්‍ය ලේකම් කරන්නට හදන්නේ මාර්කෝ රූබියෝ ය. මාර්කෝ යනු සෙනෙටි සභිකයෙකි. වමේ දේශපාලනය දැඩිව ප්‍රතික්ෂේප කරන්නෙකි. ඔහු වරක් ප්‍රසිද්ධියේ පවසා තිබුණේිමාක්ස්වාදය යනු මානව වර්ගයා මෙතෙක් දැන සිටි එකම දුෂ්ඨ හා විනාශකාරී දෘෂ්ඨිවාදය බවයි.’ ඔහුගේ එම ප්‍රකාශයට චීනය පැල් බැඳගෙන ගැහුවේය. රූබියෝට චීනය ආරාධනා කළේ මාක්ස්වාදය උගන්වන්න එන්න යනුවෙනි.

ඒ රූබියෝ රාජ්‍ය ලේකම් වුණත්, නැතත් ඔහු ට්‍රම්ප්ගේ අතිශය සමීප කවයේ අයෙකි. ලංකාවේ බලයට පත්වූ අනුර කුමාර දිසානායක ජනාධිපතිවරයාගේ ආණ්ඩුව ද ජාත්‍යන්තර මාධ්‍ය හැඳින්වූයේ මාක්ස්වාදය පෙරටු කරගත් ආණ්ඩුවක් බවයි. කොහොම වුණත් ලංකාවේ දැනට සිටින ඇමෙරිකානු තානාපතිනි ජූලි චන්ග් ආණ්ඩුව සමග සුහදශීලීව කටයුතු කරමින් සිටී. එහෙත් ඇය වෙනුවට දැන් පත්ව එන්නට ඉන්නේ එලිසබෙත් කේ. හෝර්ස්ට් ය. ඇයට ට්‍රම්ප්ගේ ආණ්ඩුවෙන් ලැබෙන උපදෙස් වෙනස් ඒවා විය හැකිය. අනෙක් අතට හෝර්ස්ට්ගේ ස්වාමි පුරුෂයා යනු ජේසන් පී. ග්‍රේෂ් ය. ඔහු ඇමෙරිකානු ආරක්ෂක ලේකම් කාර්යාලයේ සේවය කරන, යුක්රේනයේ සිටි රාජ්‍ය ප්‍රතිපත්ති පිළිබඳ උපදේශකවරයෙකි. 

ට්‍රම්ප්ගේ ජයග්‍රහණයෙන් පසු කතාබහට ලක්වන තවත් කාරණයකි, ඊශ්‍රායල් අගමැති බෙන්ජමින් නෙතන්යාහුගේ හැසිරීම. ට්්‍රම්ප් දිනුවා කියන්නේ ඔහු දිනුවා වගේ ය. නෙතන්යාහුගේ දීර්ඝ කාලීන ඉලක්කයකි, ඉරානයට පහරදීම. ඒ සඳහා ඩිමොක්‍රටික් පක්ෂය නියෝජනය කරන ඔබාමාගේ සිට ඇමෙරිකානු ජනාධිපතිවරුන් පොළඹවා ගන්නට උත්සාහ කළද, එය අසාර්ථක විය. 2020 සිට පැවැති ජෝ බයිඩ්න් ජනාධිපතිවරයාගේ ආණ්ඩුවේ තීරණාත්මක කාර්යභාරයක් තිරය පිටුපස සිට කළේ ඔබාමා ය. කමලා හැරිස්ගේ මැතිවරණ ප්‍රචාරක ව්‍යාපාරයේ බර ඇද්දේද ඔහු ය. ඒ පැත්තෙන් බලන විට මේ පරාජයට පත්වී ඇත්තේ කමලා හැරිස්ටත් වඩා ඔබාමා ය. ලෝකයේ විශිෂ්ඨතම නායකයකු ලෙස ඉහළට එසවුණු ඔබාමා ය. 

ට්‍රම්ප්ලා - නෙතන්යාහුලා එක්ව යන ගමන

කතාව පටන් ගත්තේ නෙතන්යාහු ගැන කියන්නට ය. ඊශ්‍රායල් යුද්ධය නෙතන්යාහු විසින් පසුගිය වසරේ සිට ඇදගෙන යන්නට පටන්ගත්තේ ද ට්‍රම්ප් ජනාධිපති කරන්නට බව අපි මේ තීරයේත් ලීවෙමු. මේ පිටුපස වෙනස් කතාවක් ද තිබේ. 

ට්‍රම්ප්ලා නියෝජනය කරන්නේ නව ක්‍රිස්තියානි දහමකි. එය ඊශ්‍රායල් - ඇමෙරිකා සම්මිශ්‍රණයකි. එහි ඇති විශේෂ කරුණක් වන්නේ ලෝක යුද්ධයක් ඇතිවී, ඔවුන් විශ්වාස කරන දෙවියන් විසින් එම දහම ව්‍යාපාත් කිරීමයි. ට්‍රම්ප් සහ ඔහුගේ සමීපතමයෝ මෙය අදහති. නෙතන්යාහු ද ඉන්නේ එතැන ය. ඒ කියන්නේ තකට-තක ය. ඔවුන් මේ විශ්වාසය මත ඉරානයට පහර දී මැද පෙරදිග දරුණු යුද්ධයකට ඇද නොදමන්නේ යැයි කිව නොහැකිය. ඒ නිසා ට්‍රම්ප්ගේ ජයග්‍රහණය ලෝකයට ම තීරණාත්මක ය. 

මේ අතර හාවර්ඩ් විශ්වවිද්‍යාලයේ ග්‍රැහැම් ඇලිසන් කියන්නේ තවත් බලවතකු නැගීගෙන එන බවක් පෙනෙන විට සිටින බලවතා කරන්නේ වහාම ඔහුගේ ගමන කඩාවැට්ටවීමේ උපක්‍රම නිර්මාණය කරන බවයි. ඊශ්‍රායලය සහ ඉරානය අතර කතාවත්, ඇමෙරිකාව සහ චීනය අතර කතාවත් මේ ඔස්සේ කියවාගැනීම ද වැදගත් ය.

ට්‍රම්ප්ගේ ජයග්‍රහණය ගැන අනුර අවදියෙන්

මේ ජාත්‍යන්තර දේශපාලනයේ තීරණාත්මක තත්ත්වයන් ගැන ආණ්ඩුව මේ දිනවල සිටින්නේ දැඩි අවධානයෙන් ය. ඔවුන් දැනටමත් තීරණාත්මක රටවල් සියල්ලේ ම තානාපති නිලධාරීන් වෙනස් කිරීමට තීරණය කර තිබේ. ඔවුන් ආපසු කැඳවා ඇත. මේ ආපසු කැඳවීම කියන්නේ ද එක රැයකින් සිදු කළ හැකි දෙයක් නොවේ. ඊට යම් කාලයක් ගතවේ. තානාපති නිලධාරීන් තම-තමන්ගේ රාජකාරි බාරදීම, භාවිත කළ භාණ්ඩ, වාහන ඇතුළු සියල්ල බාරදීම, තමන් සේවය කළ රාජ්‍යයෙන් නිල වශයෙන් සමුගැනීම වැනි කරුණු ද මේ අතර වේ.

නීතිපති හොඳට අහගනී

පසුගිය සතියේ සියල්ලන්ගේ අවධානය හදිසියේ යොමුවූ සිදුවීමක් විය. එමගින් ආණ්ඩුවට දැඩි විවේචනයක් ද එල්ල වූ අතර, සිදුවීමෙන් ආණ්ඩුව ද කලබලයට පත්වූ බවක් පෙනෙන්නට තිබිණි. පොලිස් විශේෂ කාර්ය බලකාය මගින් අත්අඩංගුවට ගත් සැකකරුවකු ආයුධ පෙන්වීමට ගොස් මියයෑම මෙහි මුල් සිදුවීම විය. නිලධාරීන් ආක්මාරක්ෂාවට වෙඩි තැබූ බව පැවසුවද, මරණ පරීක්ෂණයෙන් පසු බලපිටිය මහෙස්ත්‍රාත්වරයා තීරණය කර තිබුණේ මෙහිදී අපරාධයක් සිදු වී ඇති බවයි. එම නිසා ඊට වගකිවයුතු සැකකරුවන් අත්අඩංගුවට ගන්නා ලෙස ද අධිකරණයෙන් නියෝග කර තිබිණි. ඒ පසුගිය ජූලි මාසයේදී ය.

හදිසියේම පසුගිය නොවැම්බර් 04 වැනිදා නීතිපති දෙපාර්තමේන්තුවෙන් පොලිස් නීති කොට්ඨාසයටත්, බලපිටිය මහෙස්ත්‍රාත් අධිකරණයටත් ලිපියක් යවා තිබුණේ මේ සිදුවීම සම්බන්ධයෙන් ඉදිරි පියවර නොගන්නා බව දන්වමින් ය. හරියටම මහර බන්ධනාගාරයේ සිදුවීම වගේ ම ය. එහිදී ද නීතිපති දෙපාර්තමේන්තුව ලිපියන් යවමින් පොලිස් නීති කොට්ඨාසයටත්, වැලිසර මහෙස්ත්‍රාත් අධිකරණයටත් දැනුම් දී තිබුණේ එම නඩුව ඉදිරියට පවත්වාගෙන නොයන බවටයි.

බලිපිටියේ සිදුවීම පත්තු විය. නීතිපතිවරයාට දැඩි දෝෂාරෝපණයක් එල්ල වූ අතර, ජනාධිපතිවරයාගේ පැත්තෙන් මේ පිළිබඳ ගැඹුරු විමසීමක් ද සිදු කර ඇත. නීතිපති දෙපාර්තමේන්තුව ඇතුළෙන් ද මීට විරෝධය එල්ල වී ඇති අතර, ඒ අනුව ආරංචි විදිහට ඒ ලියුම නැවත කැඳවීමටත්, අධිකරණ නියෝග අනුව ඉදිරි කටයුතු සිදුවීමටත් නියමිත ය. නීතිපති දෙපාර්තමේන්තුව මින් ඉදිරියට මෙවැනි වැඩ නොකරනු ඇතැයි යන්න පසුගිය සතියේ උපරිමාධිකරණ සංකීර්ණයේ කතා වූ විශේෂ ම කතාව විය. 

බල්ලෝ අනිති - මී හරක් බුරති

පසුගිය සතියේ පැවැති කැබිනට් තීරණ දැනුම් දීමේ මාධ්‍ය හමුවේදී විජිත හේරත් ඇමැතිවරයා අමුතු කතාවක් කිව්වේය. එය ඔහුගේ කතාවක් නොවේ. පැහැරගෙන ගොස් ඝාතනය කරන ලද මාධ්‍යවේදී රිචඩ් ද සොයිසා කී කතාවකි.

‘බල්ලෝ අනිති. මී හරක් බුරති. නරියෝ සිනාසෙති. සිංහයෝ බලා හිඳිති.’

1990 පෙබරවාරි 18 වැනිදා අලු‍‍යම 3.30ට රිචඩ් ද සොයිසා සහ ඔහුගේ මව ජීවත් වූ වැලිකඩවත්ත නිවාස සංකීරණයේ නිවසට 32 ශ්‍රී 4748 දරන ලියාපදිංචි අංකය සහිත කොළ පැහැති ජීප් රථයකින් කඩාවැදුණු සන්නද්ධ පොලිස් නිලධාරීන් කණ්ඩායමක් විසින් ඔහු ව පැහැරගන්නා ලදි. රිචඩ්ගේ පැහැරගැනීම සම්බන්ධයෙන් ඔහුගේ මව වන ආචාර්ය මනෝරානි සරවනමුත්තු විසින් එදින ම අලු‍‍යම 4.15ට පමණ වැලිකඩ පොලිසියේ පැමිණිල්ලක් ගොනු කර තිබිණි. පැහැරගැනීම ඇසින් දුටු සාක්ෂි 07කි.

රිචඩ්ගේ ඝාතනයේ ප්‍රධාන විත්තිකරු වූ රොනී ගුණසිංහ ඇතුළු අපරාධ චූදිතයන් එවකට ආරක්ෂක ඇමැති රංජන් විජේරත්න විසින් ප්‍රසිද්ධියේ ආරක්ෂා කළ බවට චෝදනා එල්ල විය. වසර 15ක් තිස්සේ විභාග වූ රිචඩ් ද සොයිසා ඝාතන නඩුවේ අවසන් තීන්දුව 2005 ඔක්තෝබර් 09 වැනි දින ප්‍රකාශයට පත්කෙරිණි. තීන්දුවට අනුව අපරාධයේ සියලු‍‍ විත්තිකරුවන් නිදොස් කොට නිදහස් ය. තීන්දුවේ සඳහන් වුයේ සාක්ෂිකරුවන්ගේ සාක්ෂි පරස්පර විරෝධී බැවින් විත්තිකරුවන්ට එරහිව ගොනුකොට තිබු චෝදනා ඔප්පු වී නොමැති බවයි. ඒ වනවිටත් රිචඩ්ගේ මව ඇතුළු සාක්ෂිකරුවන් කිහිපදෙනකු මියගොස් තිබිණි.

රිචඩ්ගේ මව විසින් හඳුනාගෙන තිබූ ආකාරයට ඔහු ව පැහැරගැනීමට ජ්‍යෙෂ්ඨ පොලිස් අධිකාරි රොනී ගුණසිංහ, පොලිස් පරීක්ෂක ලාල් ක්‍රිෂාන්ත ධර්මසිරි පැමිණ තිබිණි. රොනී ගුණසිංහ මියගියේ රණසිංහ ප්‍රේමදාස ඝාතනය කෙරුණු බෝම්බයෙනි. පසුව අනාවරණය වූ ආකාරයට රිචඩ් ඝාතනයට පොලිස්‌ පරීක්‌ෂක එම්.ජී.ජී. දේවසුරේන්ද්‍ර, පොලිස්‌ සැරයන් වෙඩික්‌කාරගේ සරත්චන්ද්‍ර සම්බන්ධ වී ඇත.

ජනතාව ඉල්ලන වේගයට බඩු නැත 

මේ කතාව ලිව්වේ දැන් ආණ්ඩුව පසුගිය අපරාධ පිළිබඳව විමර්ශන වේගවත් කර ඇති නිසා ය. ඒවා නිවැරදිව ඉදිරියට ගියහොත් වින්දිතයන්ට යුක්තිය ඉටුවනු ඇත. ජනතාවත් ඒ පිළිබඳව සිටින්නේ දැඩි අවධානයෙන් ය. ඒ අවධානයේ තරම හොඳින්ම පෙනෙන්නේ ජනාධිපති කාර්යාලයෙන් ආරම්භ කළ දූෂණ චෝදනා පිළිබඳ තොරතුරු එකතු කිරීමේ මෙහෙයුමට ලැබෙන ප්‍රතිචාරවලින් ය. ඒ සියල්ල කඩිනමින් විමර්ශන අංශ වෙත ලබාදීමේ ක්‍රමවේදයක් සකස් කර ඇත.

එහෙත් දැන් තවත් අඩුවක් පුරවන්නට සිදුවී තිබේ. ජනතාව ප්‍රතිචාර දක්වන වේගයට වැඩ කරන්නට විමර්ශකයන් ප්‍රමාණවත් නැත. විශේෂයෙන්ම අල්ලස් හෝ දුෂණ විමර්ශන කොමිෂන් සභාව වැනි ආයතනවල මේ තත්ත්වය බරපතළ ය.

යෝෂිතට ලයිෂන් ගිනි අවි 07ක්

ආරක්ෂක අමාත්‍යංශයෙන් ලබාදී ඇති බලපත්‍ර සහිත ගිනි අවි ආපසු බාරදීම සඳහා රජය කාලයක් දුන්නේය. ඒ කාලය පසුගිය නොවැම්බර් 07 වැනිදායින් අවසන් විය. කෙසේ වෙතත් රජය තීරණය කර ඇත්තේ තවත් මාසයකින් එම කාලය දීර්ඝ කිරීමටයි. මේ ගිනි අවි සම්බන්ධයෙන් අනාවරණය වූ කතා ද රැසකි.

ඒ අතරින් එකක් වන්නේ යෝෂිත රාජපක්ෂගේ කතාවයි. යෝෂිත රාජපක්ෂට මෙවැනි ගිනි අවි 07ක් නිකුත් කර තිබී ඇත. පසුගිය සතියේදී යෝෂිතගේ පැත්තෙන් එම ගිනි අවි ආරක්ෂක අමාත්‍යංශයට බාරදී තිබේ. මේ ගිනි අවි 07 ගැන ආණ්ඩුවේ ඉහළ ම සාකච්ඡාවකදී ද අවධානය යොමුවී තිබිණි. 

‘මේ ඔක්කොම දීලා තියෙන්නෙ බුද්ධි තොරතුරු බලලද?’

මේ ප්‍රශ්නයට බුද්ධි අංශ නිලධාරීන් සතුව තොරතුරු තිබී නැත. සිවිල් පුද්ගලයකුට මෙවැනි විශාල ගිනි අවි සංඛ්‍යාවක් කෙසේ හෝ ලබාදී ඇත. එම නිසා ආණ්ඩුව තීරණය කර ඇත්තේ මෙවර ගිනි අවි ලබාදීමේදී අනිවාර්යෙන්ම පුද්ගලයන්ට ඇති තර්ජන පිළිබඳ බුද්ධි වාර්තා කැඳවීමටයි. එම බුද්ධි වාර්තා මත පදනම්ව, ගිනි අවි භාවිතය පිළිබඳ අදාළ පුද්ගලයා සතු දැනුම ද පරීක්ෂා කර අවි ලබාදීමට තීරණය කර ඇත.

බර වචන වෙනුවට සරල සිංහල

මහ බැංකුවෙන් අලු‍තින් මුදල් අච්චු ගැසීම පිළිබඳ කතාව පසුගිය සති කිහිපයේදීම සංවාදයට ලක් විය. එය මුදල් අච්චු ගැසීමක් නොවන බව මහ බැංකුවෙන් පැහැදිලිව නිවේදනය කර තිබිණි. ඒ අතර තවත් කතාවක් එළියට ආවේය. ඒ හිටපු ජනාධිපති රනිල් වික්‍රමසිංහගේ අයවැය පිළිබඳ කතාවකි. 

මේ අවුරුද්දේ අයවැය වාර්තාවට අනුව ලංකාවේ මුළු ණය ගැනීම් අවශ්‍යතාව රුපියල් බිලියන 7,350කි. රජයේ මුළු ලැබීම්වල එකතුව බිලියන 4,164කි. ණය සේවා සඳහා කළ යුතු ගෙවීම් බිලියන 6,919කි. 

මේ කරුණු නිවැරදිව එළියට ආවේ නැත. එම නිසා ජනතාව අතර ද තිබුණේ කුතුහලයකි. ද්‍රවශීලතාව, මුදල් සැපයුම වැනි බර වචන කිව්වාට ජනතාවට තේරෙන්නේ නැත. මේ ගැන විශ්වවිද්‍යාල ආචාර්යවරුන් යොදවා ජනතාවට පැහැදිලි කරන්නට ආණ්ඩුව කළ වැඩේ ද තරමක් අසාර්ථක විය. ඔවුන්ගේ වචන බර වැඩි ය. එම නිසා ආණ්ඩුවේ මාධ්‍ය මෙහෙයුම් කණ්ඩායම් එකතු වී තීරණය කර ඇත්තේ ජනතාවට තේරෙන සිංහලෙන් මේවා කියන්නට ය. ඒ පිළිබඳ සැලසුමක් ද ඔවුන් සකස් කර ඇතැයි වාර්තා වේ.

ජ්‍යෙෂ්ඨයාගේ කෝල් එකෙන් ආණ්ඩුව කලබල වෙයි

ඡන්ද දිනය පිළිබඳ ශ්‍රේෂ්ඨාධිකරණයට ඉදිරිපත් කෙරුණු මූලික අයිතිවාසිකම් පෙත්සම විභාගයට නොගෙනම ප්‍රතික්ෂේප කෙරිණි. පාර්ලිමේන්තු මැතිවරණ පනතට අනුව එම දිනය සහ ඊට අදාළ ගැසට් නිවේදනය නීත්‍යනුකූල බව අධිකරණය පිළිගෙන ඇත. 

කෙසේ වෙතත් මේ ගැන කියන්නට තවත් කතාවක් තිබේ. ජනාධිපතිවරයාගේ අත්සනින්, ඔහුට ආණ්ඩුක්‍රම ව්‍යවස්ථාවේ 70 වැනි ව්‍යවස්ථාවෙන් පැවරී ඇති බලතල අනුව නිකුත් කළ මේ ගැසට් නිවෙදනයෙන් පසු මුලින්ම කතා කර තිබුණේ ශ්‍රී ලංකාවේ නීති ක්ෂේත්‍රයේ දැවැන්තයෙකි. ඔහු තවත් පිරිසක් ද සමග කතා කොට ආණ්ඩුවට කියා තිබුණේ මෙහි ගැටලු‍වක් ඇති බවක් පෙනෙන නිසා නැවත සොයාබලන ලෙසයි.

ඒ අනුව කලබල වූ ආණ්ඩුවේ නීති අංශය ජ්‍යෙෂ්ඨ නීතිඥ විජේබණ්ඩාර ප්‍රමුඛ පිරිසක් සමග මේ දින කලබලය පිළිබඳව සොයා බැලු‍වේය. ඇඟිලි ගනිමින්, නීති පොත් පෙරළමින් ඔවුන් ජනාධිපති කාර්යාලයේ දිනයක් ම මීට වෙන් කර තිබිණි. අවසානයේදී තීරණය කර තිබුණේ ගැටලු‍වක් නැති බවකි. නීතිපති දෙපාර්තමේන්තුවේ අතිරේක සොලිසිටර් ජනරාල් විරාජ් දයාරත්න ශ්‍රේෂ්ඨාධිකරණයේදී පවසා තිබුණේ ඡන්දයක් නොතියා සිටිනවාට වඩා තියන එක වැදගත් බවයි.

ලන්සා කරේ තබාගත් රනිල්

පාර්ලිමේන්තු ඡන්දය අතිශය සාමකාමී ය. එහි ගැටුම් නැත. පොලිසිය පොලිසියේ රාජකාරි කරයි. මැතිවරණ කොමිසම තදින් සිටී. මේ මැතිවරණයේදී වැඩි ම වාසිය ලබාඇත්තේ හෝටල් හිමියන් ය. ඔවුන් තමන් සහයෝගය දෙන පක්ෂයේ අපේක්ෂකයාට හෝටලයේ ශාලාව ලබාදෙයි. එපමණකි. සහභාගිවන්නන්ට කෑම - බීම ලබාදීම මැතිවරණ අල්ලස් ලබාදීමක් වන නිසා ඒවා තහනම් ය. එම නිසා හෝටල් හිමියන්ගේ මුදල් ඉතුරු ය.

හිටපු ජනාධිපති රනිල් වික්‍රමසිංහ මෙවර වැඩියෙන්ම සහයෝගය දෙන්නේ ගම්පහ දිස්ත්‍රික්කයෙන් තරග වදින නිමල් ලන්සාට ය. ඔහු කෙලින්ම කියන්නේ තමන් ජනාධිපති කරවන්නට ලන්සා වැඩ කළ බවකි. ඒ නිසා ම සමගි ජන බලවේගයේ ඇතැම් මන්ත්‍රීවරුන් ද ලන්සා සමග වැඩ කරන බවක් ආරංචි ය. කෙසේ වෙතත් ලන්සාට ජනතාව අතර ඇත්තේ නම් එතරම් හොඳ නමක් නොවේ. ඔහුට එරෙහිව බරපතළ චෝදනා ඇත. එල්ලෙන්න තැනක් නැති පාක්ෂිකයන් සමහරකට ලන්සාගේ නවාතැන හොඳ තැනක් වී තිබේ.

සජිත්ගේ උපක්‍රමය වැඩ කරයි 

සමගි ජන බලවේගය ඇතුළේ සාකච්ඡාවලදී මේ දිනවල වැඩියෙන්ම අවධානය යොමුවී ඇත්තේ ඉලක්කම් වෙත ය. ජාතික ජන බලවේගයට කීයද, අපිට කීයද යන්නයි, ඒ. සජිත් ප්‍රේමදාස පසුගිය සතියේ පැවැති එවැනි සාකච්ඡාවකදී පැහැදිලිව පවසා තිබුණේ 2020 පාර්ලිමේන්තු මැතිවරණයට වඩා මෙවර සමගි ජන බලවේගය ඡන්ද ගන්නා බවයි. 

2019 ජනාධිපතිවරණයෙන් ලබාගත් ඡන්ද සංඛ්‍යාවට වඩා බාගයකින් අඩු ගණනකි, 2020 අගෝස්තු 05 වැනිදා පැවැති පාර්ලිමේන්තු මැතිවරණයේදී සමගි ජන බලවේගය ලබාගත්තේ. සජිත්ගේ මේ ආකාරයේ රැස්වීම් ගණනාවකින් පසු සජබයට හිතවත් ව්‍යාපාරිකයන් තරමක් මුදල් විසිකරන්නට ද පටන්ගෙන ඇත. පසුගිය ටිකේ ඔවුන් සිටියේ නිහඬව ය. කොහොමත් මොනවා කරන්නටත් ප්‍රචාරක කටයුතුවලට තව ඇත්තේ දින 02කි. ලබන සතියේ අලු‍ත් ආණ්ඩුවකි.