මේ සතිය තමයි, සතිය !

ලංකාවේ දේශපාලනය කියන්නේ හුදෙකලා එකක් නොවේ. ලංකාවට විතරක් නොව කිසිදු රටකට මේ කාලයේ හුදෙකලා කතා නැත. භූදේශපාලනය කියන්නේ මේ කාලයේ ලෝකයේ අංක එකේ විෂයයි. ඒ විෂය යටතේ ගත්තත්, ලංකාවේ මහ පොළොවේ දේශපාලනය ගත්තත් මේ සතිය තමයි සතිය ය.

මේ වන විට ලෝකයේ තැන් ගණනාවක, හරියටම කිවහොත් ස්ථාන පහක තීරණාත්මක යුද්ධ ඇරඹී තිබේ. ඊශ්‍රායලයට ඉරානය ගිය සතියේ මිසයිල් 180කින් පහර දුන්නේය. ඊශ්‍රායලය ඊට ප්‍රතිචාර දක්වන බව පවසා ඇත. ඉරානය පසුගිය අප්‍රේල් මාසයේදී මිසයිල 140කින් ඊශ්‍රායලයට පහර දුන්නේය. ඊශ්‍රායලය ඉරානයේ අගනුවර ටෙහෙරානයේදී, එරට නව ජනාධිපතිවරයාගේ දිවුරුම් දීමේ උත්සවයට පැමිණි හමාස් සංවිධානයේ දේශපාලන අංශයේ නායකයා වූ හනියේ ඝාතනය කළේය. ඒ අතර ඊශ්‍රායලය ලෙබනනයට ගොඩබිමෙන් පහරදෙමින් සිටී. අනෙක් පැත්තෙන් යේමනයේ හූති සටන්කරුවන් සමග යුද්ධයක් ආරම්භ කර තිබේ.

ට්‍රම්ප්ගේ මිත්‍රයා නෙතන්යාහුගේ වැඩ

නෙතන්යාහුගේ මිත්‍රයා ට්‍රම්ප් ය. නෙතන්යාහු යනු ඊශ්‍රායලයේ අගමැතිවරයා ය. ට්‍රම්ප් යනු වරක් ඇමෙරිකා එක්සත් ජනපදයේ ජනාධිපති ධුරයට පත්වූ, මේ නොවැම්බරයේ පැවැත්වෙන ඇමෙරිකානු ජනාධිපතිවරණයටත් ඉදිරිපත් වී සිටින ඩොනල්ඩ් ට්‍රම්ප් ය. නෙතන්යාහුගේ ඉලක්කය ට්‍රම්ප් ජනාධිපති ධුරයට පත්කිරීමයි. ඊශ්‍රායල ප්‍රශ්නය ගැන කතා කරමින් ට්‍රම්ප් කිව්වේ කමලා හැරිස් ජනාධිපති ධුරයට පත්වුවහොත්, තුන්වැනි ලෝක යුද්ධයක් බලාපොරොත්තු වන ලෙසයි. ට්‍රම්ප්ගේ ඡන්ද ගොඩේ සරණාගත ඡන්ද කුට්ටියක් ඇත. ඒ ඡන්ද කුට්ටිය ට්‍රම්ප්ට අරන් දෙන කොන්ත්‍රාත්තුව කරන්නේ නෙතන්යාහු ය. 

මේ අතර රුසියාව සහ යුක්රේනය අතර යුද්ධය ද තිබේ. සෙලෙන්ස්කි හෙවත් යුක්රේනයේ නායකයා මේ වන විට සෘජුව ම බි්‍රතාන්‍යය සමග ගනුදෙනු කරයි. රුසියාවේ එහා කෙළවරට විදිය හැකි නවීනතම මිසයිල යුක්රේනයට ලබාදීමට බි්‍රතාන්‍යය එකඟතාව පළකර තිබේ. මේවා රහසිගත නොවන ගනුදෙනු ය. තමන් සෙලෙන්ස්කිට උදව් කරන බව බි්‍රතාන්‍යය කෙලින්ම කියයි. සෙලෙන්ස්කි ඒ අතරේ රුසියාව වටේ ඇති රටවල් සමග සම්බන්ධතා වර්ධනය කරගනිමින් සිටී. ඔපෙක් හෙවත් ඛනිජ තෙල් නිෂ්පාදනය කරන රටවල්වල එකතුවේ මේ යුද්ධ ඇති රටවල් තිබේ. 32023 වසරේදී ඊශ්‍රායලය ලෝක බොර තෙල් නිෂ්පාදනයෙන් සියයට දෙකක් නිෂ්පාදනය කරද්දී, රුසියාව ලෝක බොර තෙල් නිෂ්පාදනයෙන් සියයට 12කට ආසන්න නිෂ්පාදනය කරයි.

සෞදිය අත්හැරිය හැකිද?

මේ සිදුවීම් දාමයට සම්බන්ධ කළ හැකි තවත් සිදුවීමක් තිබේ. ඒ 2018 ඔක්තෝබර් 02දා තුර්කියේ ඉස්තාන්බුල් නුවර පිහිටි සෞදි කොන්සල් කාර්යාලය තුළදී මාධ්‍යවේදියකු ඝාතනය කිරීමයි. වොෂින්ටන් පෝස්ට් පුවත්පතේ මාධ්‍යවේදියකු ලෙස කටයුතු කළ මේ මාධ්‍යවේදියා ජමාල් කෂෝගි ය. කෂෝගිගේ ඝාතනය අමානුෂික එකක් බව සියලු‍ මාධ්‍ය මගින් වාර්තා කෙරිණි. එතැනදී ප්‍රශ්නයක් මතු වේ. මානුෂික ඝාතන තිබේ ද?

සෞදියේ මොහොමඩ් බින් සල්මාන්ට ය, මේ ඝාතනය පිළිබඳ චෝදනාව එල්ල වූයේ. තමන්ගේ කිසිදු මැදිහත්වීමක් නොවූවද, රටේ නායකයා ලෙස තම පුරවැසියන් පිරිසක් කළ මේ ගාතනය සම්බන්ධයෙන් වන වගකීම තමන් බාරගන්නා බව මොහොමඩ් බින් සල්මාන් කුමරු ඇමෙරිකානු මාධ්‍ය ජාලයක් වන සීබීඑස් හි මිනිත්තු 60 වැඩසටහනට එක්වෙමින් පවසා තිබිණි. 

සල්මාන් කුමරුගේ මේ වැඩසටහන විකාශය කිරීමෙන් පසු කෂෝගීගේ පෙම්වතිය වූ හේටීස් සෙන්ගීස් මෙසේ ප්‍රතිචාර දක්වා තිබිණි. ඒ ඇයගේ ට්විටර් සමාජ මාධ්‍ය ගිණුමේ ය.

‘ඔහු නියම දේශපාලන සූත්තරකාරයෙක්. ඔහුගේ නියෝග මත සියල්ල සිදුවී තිබියදී සවුදියේ නායකයා ලෙස තමන්ට ඇති බලය ප්‍රයෝජනයට ගනිමින් ඔහු ලෝකය රවටනවා. ඔහු නොදැනුවත්ව වෙනත් රටකට ඇතුළු වී ඔතරම් බිහිසුණු ක්‍රියාවක් කරන්නට කිසිවකුට බැහැ.’

ඇයගේ ප්‍රකාශයේ ඇති වැදගත් කොටසක් වන්නේිසවුදියේ නායකයා ලෙස තමන්ට ඇති බලය’ යන්නයි. එංගලන්තයේ ලන්ඩන් නුවර මූලික කරගෙන පවත්වාගෙන යන, අරාබි භාෂාවෙන් මුද්‍රණය කෙරෙන අෂාර්ක් අල්-අව්සාත් පුවත්පතට සම්මුඛ සාකච්ඡාවක් ලබාදෙමින් සල්මාන් කුමරු ඒ කොටස තහවුරු කර තිබුණේ මෙසේ ය.

‘කෂෝගි ඝාතනයට යුක්තිය ඉටුකිරීම අපේ රටේ වැඩක්. ඒකෙන් දේශපාලන වාසි ගන්න හැදුවොත් බලාගෙනයි.’

එක්සත් ජාතීන්ගේ සංවිධානය මේ ඝාතනය පිළිබඳව පිටු 100ක වාර්තාවක් සකස් කර තිබිණි. එහි පැහැදිලිව සඳහන් වන්නේ කෂෝගි ඝාතනයට සල්මාන් කුමරු සෘජුව සම්බන්ධ වී ඇති බවයි. මේ ඝාතනය සම්බන්ධයෙන් චෝදනා එල්ල වූයේ සල්මාන් කුමරුගේ විශේෂ ඒකකයකටයි. සල්මාන් කුමරුගේ ජ්‍යෙෂ්ඨ උපදේශකයකු වූ සවුද් අල් කටානි ස්කයිප් තාක්ෂණය ඔස්සේ කෂෝගි ඝාතනයට මොහොතකට පෙර ඝාතකයන් අමතා ඇතැයි රොයිටර් පුවත් සේවය වාර්තා කර තිබිණි. 

‘ඔය බල්ලාගේ හිස මට ගෙනැත් දෙන්න.’

ඔහු කියා තිබුණේ එසේ ය.

සිදුවීම එයාකාර ය. එහිදී හැසිරීම මෙයොකාර ය.

‘ණය බර කියා සද්ද නැතුව ඉන්න බෑ’

මේ ඝාතනය පිළිබඳව මුලින්ම අනාවරණය කරන ලද්දේ තුර්කි ආරක්ෂක අංශ විසින් ය. තුර්කි ජනාධිපති රිසෙප් එර්ඩෝගන් ඒ මොහොතේ ම විශේෂ ප්‍රකාශයක් කරමින් පැවසුවේිසෞදි රජු මේ ඝාතනය සම්බන්ධයෙන් යුක්තිය ඉටුකිරීමේදී අවංකව කටයුතු කළ යුතු බවයි.’ තුර්කිය මෙහිදී විශේෂ වැඩ කොටසක් නොකරන්නට, මේ ඝාතනය යටයන්නට හෝ වෙනත් ඉසව්වකට ගමන් කරන්නට ඉඩ තිබිණි. ඝාතනයට සෘජුව සම්බන්ධ වූ සැකකරුවන් 18 දෙනෙකු තුර්කි ආරක්ෂක අංශ මගින් අත්අඩංගුවට ගැනිණි. ඝාතනයෙන් පසු විශේෂ ගුවන්යානයකින් කිසියම් පිරිසක් සෞදියට පිටත්ව ගොස් ඇතැයි ද ඔවුහු සාක්ෂි සහිතව අනාවරණය කළහ. තුර්කිය මේ සියල්ල කළේ සෞදියට දැවැන්ත ණය මුදලක් ගෙවීමට තිබියදී ය. සෞදියේ ආර්ථික බලය යට හිඳිමින් එහෙත් අභියෝග කරමින් ය.

හොඳ ම කතාව එය නොවේ. ඝාතනය සිදු වූ විගස ප්‍රකාශයක් කරමින් එවකට ඇමෙරිකානු ජනාධිපති ඩොනල්ඩ් ට්‍රම්ප් පැවසුවේ කෂෝගි තමන්ගේ රටේ පුරවැසියකු බවත්, මේ ඝාතනය සම්බන්ධයෙන් වන විමර්ශන නිවැරදිව සිදුනොකරන්නේ නම්, තමන්ට සෞදිය සම්බන්ධයෙන් තීරණයක් ගැනීමට සිදු වන බවයි. ඊට පිළිතුරු ලෙස සෞදිය පැවසුවේ ඇමෙරිකාව සමග අත්සන් කිරීමට නියමිත වූ ඉතිහාසයේ දැවැන්තම අවි ගනුදෙනුවකට අදාළ ගිවිසුමක් ඇතැම් විට අත්හිටුවීමට සිදු වන බවයි. කෂෝගි ගැන ට්‍රම්ප් ඊට වඩා වචනයක්වත් කතා කළේ නැත. 

එපමණක්ද? සෞදි අරාබි ආයෝජන සමුළුව හෙවත් ඩාවෝස් ඉන් ද ඩෙසර්ට් සඳහා සහභාගි නොවන බවත්, ඊට හේතුව කෂෝගි ඝාතනයට විරෝධය පෑම බවත් ලෝකයේ බිලියනපති ව්‍යාපාරිකයෝ රැසක් එක්වර පැවසූහ. සල්මාන් කුමරු පැවසුවේිස්තූතියි’ යනුවෙන් පමණි. 2018 ඔක්තෝබර් 23දා පැවැති ඒ වසරේ අදාළ සමුළුවට පෙර විරෝධය පෑ සියල්ලෝ ම සහභාගි වූහ.

ලෝකය දුවන්නේ එහෙම පාරක ය. ඒ අතර ය, ලංකාව වැනි කුඩා ආර්ථිකයක් සහිත, පෞද්ගලික ණය හිමියන්ගෙන් පවා හිරවී ඇති රටක ජාත්‍යන්තර දේශපාලනය, විදේශ ප්‍රතිපත්ති තීරණය කිරීමට සිදු වී ඇත්තේ. අනෙක් අතට බලය වෙනුවෙන් කටයුතු කිරීමේදී පුද්ගල ජීවිත කියන්නේ සත පහකට නොවටිනා දෙයක් බව ද මේ උදාහරණවලින් පෙනේ.

අපරාධ ගැන අලු‍ත් මෙහෙයුම් ඇරඹෙයි

අලු‍ත් ආණ්ඩුව පත්වීමෙන් පසු අපරාධ පරීක්ෂණ දෙපාර්තමේන්තුවට නියෝගයක් කර තිබේ. ඒ විමර්ශන සිදු කරන බරපතළ අපරාධ පිළිබඳ ලැයිස්තුවක් ලබාදෙන ලෙසයි. එසේ ම ඒවායේ විමර්ශන ප්‍රගතිය පිළිබඳ නීතිපති දෙපාර්තමේන්තුවට දැනුම් දෙන ලෙස ද උපදෙස් දී ඇත. පසුගිය සතියේ සිරිල් ගාමිණී පියතුමා පැවසුවේ පාස්කු ඉරිදා ත්‍රස්ත ප්‍රහාරය පිළිබඳ පරීක්ෂණ පැවැත්වූ ජනාධිපති කොමිසමේ වාර්තාවේ කොටස් අතුරුදන්ව ඇති බවයි. අබු හින්ද් හොයන්නට ආණ්ඩුවට අවශ්‍යතාවක් නොතිබූ බවයි. අපරාධ පරීක්ෂණ දෙපාර්තමේන්තුවේ එවකට හිටපු අධ්‍යක්ෂ විශ්‍රාමලත් ජ්‍යෙෂ්ඨ පොලිස් අධිකාරි ශානි අබේසේකර කියා තිබුණේ විමර්ශන අඩාල කිරීමට තමන් ඇතුළු විමර්ශකයන් මාරු කළ බවයි.

මාධ්‍යවේදී ලසන්ත වික්‍රමතුංග ඝාතනය සම්බන්ධයෙන් වන විමර්ශන ඇත්තේ තීරණාත්මක තැනක ය. කොළඹ පිහිටි ඒකාබද්ධ මෙහෙයුම් මූලස්ථානයේ අණදෙන නිලධාරියා වශයෙන් යුද්ධයේ අවසන් කාලයේ සිටියේ මේ වන විට විශ්‍රාමික ව සිටින මේජර් ජෙනරාල් කුමා හේරත් ය. ලසන්ත ඝාතනය වන විටත් ඔහු සිටියේ එම තනතුරේ ය. 

ඔහු ගෝඨාභය රාජපක්ෂ ජනාධිපති කරන්නට විශාල වෙහෙසක් දැරූවෙකි. පසුව ඒ ආණ්ඩුවෙන් රජයේ සංස්ථාවක සභාපති ධුරයක් ද ගත්තෙකි. මේ මේජර් ජෙනරාල්වරයා ලසන්ත ඝාතනය පිළිබඳව අපරාධ පරීක්ෂණ දෙපාර්තමේන්තුවට වැදගත් තොරතුරක් ලබාදෙමින් දුරකතන පණිවුඩයක් ගැන කියයි. ඔහු අලු‍ත් ආණ්ඩුවට ද පණිවුඩයක් යවමින් පවසා ඇත්තේ තමන් ඒ පිළිබඳ යළිත් සාක්ෂි දෙන්නට සූදානම් බවයි. විමර්ශනවලට සහාය දෙන්නට සූදානම් බවයි.

අලු‍ත් ආණ්ඩුවෙන් ඔහුට හැරෙන තැපෑලෙන් උපදෙසක් ලැබී තිබේ. ඒ, පිළිබඳ විමර්ශනය කරන ආයතනය වන අපරාධ පරීක්ෂණ දෙපාර්තමේන්තුව දැනුවත් කරන ලෙසත්, ඔවුන්ගේ උපදෙස් මත කටයුතු කරන ලෙසත් ය. ඒ අනුව දෙවැනි වරටත් විශ්‍රාමික මේජර් ජෙනරාල්වරයා විසින් අපරාධ පරීක්ෂණ දෙපාර්තමේන්තුවට යෑමට නියමිත ය. එහෙත් මේ සියල්ල හරි තැනින් අල්ලා ගත යුතුය.

ජනතාව අනුර කුමාර දිසානායක ජනාධිපතිවරයා ලෙස පත්කිරීමට කටයුතු කළේ ආර්ථික පීඩනය නිසා බව ඇත්ත ය. ඒත් හොරු ඇල්ලීම සහ තීරණාත්මක දේශපාලන අපරාධවල අපරාධකරුවන්ට දඬුවම් කිරීම ද එහි ප්‍රධාන තැනක විය. ආණ්ඩුව මේ ජනතා අපේක්ෂා ඉදිරියට ගත යුතුය. ඒ අනුව රජයේ වියදම් කප්පාදුව ආණ්ඩුව සීග්‍රයෙන් කරමින් සිටී. අපරාධ පරීක්ෂණ වැඩ ද අරඹමින් සිටී.

අනුර - ජායිශංකර් හමුව

අනුර කුමාර දිසානායක ජනාධිපතිවරයා සහ ඉන්දීය විදේශ කටයුතු ඇමැති එස්. ජෙයිශංකර් අතර හමුව පසුගිය සිකුරාදා පැවැත්විණි. එදින ම ඇමැතිවරයා අගමැති හරිනි අමරුසූරිය ද හමු වූ අතර, ජනාධිපතිවරයාට පළමු නිල සංචාරය සඳහා ඉන්දියාවට ආරාධනා කිරීම ද මෙහිදී සිදු විය. ඉන්දියාව ලංකාවේ ආර්ථිකය ස්ථාවර කරගැනීම සඳහා කොන්දේසි රහිත සහායක් ලබාදෙන බව ද මෙහිදී ඉන්දීය විදේශ ඇමැතිවරයාගේ පාර්ශ්වයෙන් සඳහන් කර තිබේ.

ඉන්දියාව මගින් ලංකාවේ සිදුකරන සංවර්ධන ව්‍යාපෘති නැවත සලකාබැලීමේ අවශ්‍යතාව ද මෙහිදී ජනාධිපතිවරයා විසින් අවධාරණය කර ඇති අතර, ගැටලු‍ ඇත්නම් ඒවා සාකච්ඡා මාර්ගයෙන් විසඳාගැනීමට සූදානම් බව ද මෙහිදී ඉන්දියාව පැත්තෙන් පෙන්වා දී ඇත.

මේ සතිය තමයි සතිය 

පාර්ලිමේන්තු මැතිවරණයේ නාම යෝජනා බාරගැනීම පසුගිය සිකුරාදා සිට ඇරඹිණි. එහි හොඳම දවස් ටික ඇත්තේ මේ සතියේ ය. කොටස් වූ දෙමළ සන්ධානය වෙනුවට වෙනත් ශක්තිමත් බලවේගයක් සකස් කෙරෙමින් තිබේ. ඒ අතර එම්.ඒ. සුමන්තිරන් මන්ත්‍රීවරයා ප්‍රසිද්ධියේ ජාතික ජන බලවේගයට සහාය දක්වන බව පෙනෙන්නට තිබේ. ඔහු පසුගිය සතියේ ද ප්‍රකාශයක් කරමින් සඳහන් කළේ බාර් පර්මිට් දුන් දේශපාලනඥයන්ගේ නම් ප්‍රසිද්ධ කරන ලෙසයි.

මේ බාර් පර්මිට් වැඩේ සිදු කළේ ආණ්ඩුවට සල්ලි හොයන්නට යනුවෙන් වෙනත් කතාවක් ඉස්මතු කෙරෙමින් ද තිබේ. ඒ අනුව කතාව මෙසේ ය. මෙතෙක් නොදී තිබූ බාර් පර්මිට් වර්ගයක් රනිල් වික්‍රමසිංහ හිටපු ජනාධිපතිවරයා විසින් දීමට පටන්ගෙන තිබේ. සුරා බදු පනතට අනුව මේ පර්මිට් දිය හැකි ප්‍රමාණය අඩු ය. එම නිසා හීන් සීරුවේ පනත සංශෝධනය කර වැඩි පර්මිට් ප්‍රමාණයක් දෙන්නට පටන්ගෙන තිබේ. කෙළවරක් නැති පර්මිට් සහ පර්මිට් කතාව ආවේ එතැනින් ය. කෙසේ හෝ මේ යට වෙනත් ගනුදෙනු රැසක් සිදුවී ඇති බවක් කියන්නේ ආරංචියේ හැටියට කේ.කේ. පියදාස ය. ඔහු බාර් පර්මිට් රැසක හිමිකරුවෙකි. නුවරඑළියේ අයිතිකරුවෙකි. ජනාධිපති අපේක්ෂකයෙකු ද වූ ඔහු දැන් මේ ගැන කතාකරන්නට පටන්ගෙන ඇත්තේ තමන් බලාපොරොත්තු වූ පර්මිට් ප්‍රමාණයක් නොලැබීම නිසා බවක් ද වාර්තා වේ. 

නීති විරෝධී අවි ගබඩාවක් මතු වූ හැටි

තවත් කතාවක් තිබේ. රජයේ ආයතනයක් තුළ නීතිවිරෝධී අවි ගබඩාවක් තිබේ. මේ ගැන කියන්නේ අප නොවේ. මේ ගැන ජනාධිපතිවරයාට ලිඛිත දැනුම්දීමක් කර ඇත්තේ ඒ ගබඩාව ඇති තෙල් සංස්ථාවේ ඇතුළෙන්ම ය. මේ ගැන වහාම සොයාබලන ලෙසත්, මේවා ඉදිරියේදී කුමක් සඳහා භාවිතයට ගනීද යන්න සැකසහිත බවත් ඇතුළෙන් ලොකු තැනට අවධාරණය ර තිබේ. මේ සම්බන්ධයෙන් මීට පෙර ද ඉහළ නිලධාරීන් දැනුවත් කළත්, වැඩක් නොවූ බව ද එම දැනුම්දීමේ සඳහන් ය.

කොලොන්නාව තෙල් සංස්ථා පරිශ්‍රයේ දෙවැනි කලාපයේ මේ නීතිවිරෝධී අවි ගබඩාව ඇත. සංස්ථාවේ ආරක්ෂාවට ලබාදී ඇති ගිනි අවි සහ පතුරම් සහිත ආයුධ ගබඩාවට මෙහි කිසිදු සම්බන්ධයක් නැත. කෙසේ වෙතත් අදාළ දැනුම් දීමේ තවත් වැදගත් කරුණක් ඇත. ඒ, මේ වන විට එහි තිබූ ගිනි අවි ඉවත් කර ඇතැයි වාර්තා වන බවත්, පතුරම් පමණක් ඇති බවත් ය. ටී 56 උණ්ඩ, කේඑස්ජී වර්ගයේ උණ්ඩ, එස්එල්ආර් උණ්ඩ, රිවෝල්වර උණ්ඩ, මිනි ඌෂි හෙවත් පිස්තෝල් සහ කුඩා ගිනි අවි උණ්ඩ ආදී වශයෙන් මෙහි ඇති උණ්ඩ පිළිබඳ අධිකරණයට වාර්තා කළ යුතු වුවත්, මෙතෙක් එය සිදු කර නැත.

මහින්දානන්දගේ පාටියට වුණු දේ

මේ අතර මහින්දානන්ද අලු‍ත්ගමගේ හිටපු ඇමැතිවරයා පසුගිය සතියේ තෙල්දෙනියේදී සාදයක් දැමීය. ලොහාන් රත්වත්තේගේ සංවිධායකයන් පිරිසක් සහ අලු‍ත්ගමගේ සමග පෙර සිටි සංවිධායකන් පිරිසක් සමග මෙසේ කෑම සහ බීමවලින් පිරි සාදය පවත්වාගෙන ගොස් ඇත. ඒ, තෙල්දෙනිය තානායමේදී ය. වැඩේ ෂේප් එකේ සිදු වී ඇති අතර, මුල් බෝතල් කිහිපය පාඩුවේ මහින්දානන්දගේ කතා ඇසීමට වෙන්වී ඇත. ඊළඟ බෝතල් කිහිපයේදී සිදුවී ඇත්තේ එහි අනෙක් පැත්ත ය. මහින්දානන්දට කටඋත්තර නැතිවෙන්නට කියා දුන් සංවිධායකයන් සියල්ලන් යන්නට ගොස් තිබේ. මහින්දානන්දට හොඳටම අවුල් වී ඇත්තේ තමන්ගෙන් හොඳට කා-බී කියපු කතාවට ය.

‘ඔබතුමාගෙ සල්ලිවලින් අපිට වැඩක් නෑ. අපි මේ පාර වෙන තැනකට යන්න තීරණේ අරන් ඉවරයි.’

කෙසේ වෙතත් මේ සාදයට තමන්ගේ සංවිධායකයන් සම්බන්ධ කළ ද, ලොහාන් පැමිණ නැත. ඊට හේතුව ලොහාන් මේ වන විට රටේ නැතිවීමයි. ලොහාන් බන්ධනාගාර විෂය බාර ඇමැතිවරයා ලෙස අනුරාධපුර බන්ධනාගාරයට ගොස් සිරකරුවන් දණගස්වා, ඔවුන්ට තර්ජනය කිරීම පිළිබඳ වාර්තා, සාක්ෂි ද සියල්ල මේ වන විට එළියට පැමිණ ඇති අතර, ඒ නඩු ද ඉදිරියේදී ඇසීමට නියමිත ය.