අනුර පාඩම පටන් ගනී !

දෙවැනි ආරක්ෂක මණ්ඩල රැස්වීම පැවැත්වුණේ උදෑසන හතට ය. වෙලාවටත් කලින් ආරක්ෂක අංශවල සියලුම ප්‍රධානීහු ජනාධිපති කාර්යාලයට පැමිණ සිටියහ. ඊට හේතු වූයේ ඔවුන්ට දවසේ වැදගත්කම, නැතහොත් ඒ රැස්වීමේ වැදගත්කම ගැන පුළුල් අවබෝධයක් තිබීම ය.

බුද්ධි තොරතුරු සහ බුද්ධි අංශ පිළිබඳ ජනතාව අතර මතුවී ඇති කුකුස තියෙන්නේ බරපතළ තැනක ය. මේත් බුද්ධි තොරතුරක් ගැන සාකච්ඡාවකි. විදේශීය බුද්ධි අංශයකින් මේ තොරතුර ලැබී ඇත්තේ සති කිහිපයකට පෙර ය. එය නිශ්චිත වූවක් නොවේ. ‘ඇතැම් විට’ ජාතියේ එකකි. ඉන්පසු තවත් විදේශීය බුද්ධි අංශයකින් මේ ගැන ඊට වඩා යමක් සහිත තොරතුරක් ලැබී ඇත. 2019 අප්‍රේල් 21 වැනිදා ගැන ජනතාවට අමතක නැත.

බුද්ධි තොරතුර ලැබී තිබුණේ 2019 අප්‍රේල් 04 වැනිදා ය. ඉන්පසු අවස්ථා කිහිපයකදී ම ඒ තොරතුර තව-තවත් නිශ්චිත වෙමින් ලැබිණි. එහෙත් අවශ්‍ය පියවර අවශ්‍ය වේලාවේදී නොගැනීම නිසා පාස්කු ඉරිදා ත්‍රස්ත ප්‍රහාරය නම් බරපතළ ඛේදවාචකය මේ පොළොවේ සිදු විය. 1953 - 1961 කාලයේ ඇමෙරිකානු ජනාධිපතිවරයා වූ ඩ්වයිට් ඩී. අයිසන්හවර් පවසා ඇත්තේ අවශ්‍ය මොහොතේ අවශ්‍ය ම දේ නොකරන්නේ නම්, ඊට නැවත කිසිදු දිනක අවස්ථාවක් නොලැබෙන බවයි. ඔහු දෙවැනි ලෝක යුද සමයේදී ඇමෙරිකාවේ සිටි ඉහළ ම හමුදා නිලධාරියා ද විය.

ඒකාබද්ධ මෙහෙයුමක්

අනුර කුමාර දිසානායක ජනාධිපතිවරයාගේ ප්‍රධානත්වයෙන් රැස් වූ මේ ආරක්ෂක මණ්ඩල රැස්වීමේදී සම්පූර්ණයෙන් ම සාකච්ඡා කර තිබුණේ ඊශ්‍රායල් ජාතිකයන්ට ප්‍රහාරයක් එල්ල වීමේ අවදානමක් සම්බන්ධ බුද්ධි තොරතුර ගැනයි. මීට පෙර ද ඒ ගැන කතා කරන්නට හදිසි ආරක්ෂක මණ්ඩල රැස්වීමක් කැඳවා තිබිණි. එහිදී ගත් තීරණයක් වී තිබුණේ ඒකාබද්ධ මෙහෙයුමක් ක්‍රියාත්මක කිරීමයි. ඒ අනුව බුද්ධි අංශ, ආරක්ෂක හමුදා, පොලිස් විශේෂ කාර්ය බලකාය, පොලිසිය ඇතුළු සියලු අංශ ඒකාබද්ධ ව ආරක්ෂක මාණ්ඩලික ප්‍රධානී ඇතුළු පිරිසකගේ මූලිකත්වයෙන් සියලු සැලසුම් සකස් කෙරිණි. 

පාස්කු ඉරිදා ත්‍රස්ත ප්‍රහාරය පිළිබඳ ව විමර්ශනය කළ ජනාධිපති පරීක්ෂණ කොමිෂන් සභාවේදී අනාවරණය වූයේ ආරක්ෂක මණ්ඩල රැස්වීම් විධිමත්ව පවත්වා නැති බවයි. ඇතැම් රැස්වීම්වලට අත්‍යවශ්‍ය ආරක්ෂක ප්‍රධානීන් කැඳවා නැති බවයි. ඇතැම් රැස්වීම්වලට නිශ්චිත හේතුවක් නොමැතිව එවකට ජනාධිපති මෛත්‍රිපාල සිරිසේනට සමීප දේශපාලනඥයන් ද සහභාගි වී ඇති බවයි. 2018 වසරේ අවසානයෙන් පසු පාස්කු ඉරිදා ත්‍රස්ත ප්‍රහාරය සිදු වන තුරු ඒ රැස්වීම පවත්වා තිබුණේ නැත. 

මෙන්න ආරක්ෂක මණ්ඩල

මේ අතර ම කියන්නට තවත් කතාවක් තිබේ. පසුව පෙරටුගාමී සමාජවාදී පක්ෂය බවට පත්වූ ජන අරගල ව්‍යාපාරයේ ක්‍රියාකාරීන් වූ ලලිත් කුමාර් වීරරාජ් සහ කුගන් මුරුගානන්දන් අතුරුදන් වූයේ 2011 දෙසැම්බර් 09 වැනිදා ය. දැන් අලුත් ආණ්ඩුව මගින් එහි විමර්ශන ද කඩිනම් කිරීමට තීරණය කර ඇත. මේ ක්‍රියාකාරිකයන් දෙදෙනා අතුරුදන් වී, දින කිහිපයකට පසු එනම් දෙසැම්බර් 15 වැනිදා පැවැති මාධ්‍ය හමුවකදී එවකට කැබිනට් ප්‍රකාශක කෙහෙළිය රඹුක්වැල්ල පවසා තිබුණේ ලලිත් - කුගන් අතුරුදන් වී නැති බවත්, ඔවුන් දෙදෙනා අත්අඩංගුවට ගෙන ඇති බවත් ය. ඔවුන් කඩිනමින් අධිකරණයකට ඉදිරිපත් කරනු ඇතැයි ද ඔහු ඒ වෙලාවේ කියා තිබිණි.

ඉන්පසු මේ කරුණ අධිකරණයට ඉදිරිපත් කෙරිණි. ඒ අනුව මේ අත්අඩංගුවට ගත් කතාව ගැන විමසන්නට කෙහෙළිය රඹුක්වැල්ල යාපනය මහෙස්ත්‍රාත් අධිකරණයට කැඳවිණි. ඔහු කිව්වේ කුමක්ද? ඒත් ආරක්ෂක මණ්ඩල කතාවකි. ආරක්ෂක මණ්ඩලයේ සිටි කෙනෙක් තමන්ට එසේ කී බවක් ඔහු අධිකරණයට කිව්වේය. තවත් එක් අතීත ආරක්ෂක මණ්ඩල කතාවක් ලිවිය යුතුය. ඒ ලසන්ත වික්‍රමතුංග ඝාතනයෙන් පසු පැවැති ආරක්ෂක මණ්ඩල රැස්වීමක් ගැන කතාවකි. මේ කතාව මාධ්‍යයකට කියා තිබුණේ ඒකාබද්ධ මෙහෙයුම් මූලස්ථානයේ එවකට ප්‍රධානියා ව සිටි වර්තමානයේ විශ්‍රාමික මේජර් ජෙනරාල් කුමා හේරත් ය. ඒ, ඔහු විසින් ආරක්ෂක මණ්ඩල රැස්වීමකදී ලසන්ත ඝාතනය ගැන කතා කරන්නට ගත් විට ඒක මෙතැන්ට අවශ්‍ය නැති බවක් බහුතරයෙන් පැවසුණු බවයි. මේවා ඕපාදූප නොවේ. සාක්ෂි සහිත කතා ය.

මේ හදිස්සිය මොකක්ද?

දැන් නැවතත් අනුර කුමාර දිසානායක ජනාධිපතිවරයාගේ ප්‍රධානත්වයෙන් රැස්වූ ආරක්ෂක මණ්ඩල රැස්වීමට පැමිණිය යුතුය. ඊශ්‍රායල ජාතිකයන්ට ප්‍රහාරයක් එල්ල විය හැකි බවට ලද බුද්ධි තොරතුර අනුව ආරක්ෂක අංශ යෙදවිණි. සාමාන්‍යයෙන් ඊශ්‍රායල ජාතිකයන් වැඩියෙන්ම පැමිණෙන තැනකි, ආරුගම්බේ. ඊට හේතුව වන්නේ ඔවුන් සර්ෆින් හෙවත් මුහුදේ ලිස්සා යෑමේ ක්‍රීඩාවට ඇති කැමැත්තයි. ඒ අතරත් වැඩියෙන්ම සිටින්නේ තරුණ ඊශ්‍රායල් ජාතිකයන් ය. ඔවුන්ගෙන් ද වැඩි පිරිසක් හමුදාවෙන් නිවාඩු ලැබූ හෝ හමුදා සේවයෙන් විශ්‍රාම ලැබූ පිරිස් ය. 

ආරුගම්බේ මෙන්ම දෙහිවල අල්විස් ටවුන් ප්‍රදේශයේ, මීගමුවේ ඇතුළු බුද්ධි අංශ විසින් හඳූනාගත් ඊශ්‍රායල් ජාතිකයන් සිටින ප්‍රදේශවල ආරක්ෂාව තර කෙරිණි. දකුණු මුහුදු තීරයත් ඒ අතර විය. ජනතාව අතර කතාබහක් ඇති වූයේ ‘මොකද මේ හදිසියේ’ යනුවෙනි. එහෙත් ආණ්ඩුව පැත්තෙන් සද්දයක් තිබුණේ නැත. ආරක්ෂක මණ්ඩල රැස්වීමෙන් නොනැවතී ජනාධිපතිවරයා විසින් නිරන්තරයෙන් මේ පිළිබඳව මහජන ආරක්ෂක ඇමැති විජිත හේරත්ගෙන් සහ වැඩ බලන පොලිස්පති ප්‍රියන්ත වීරසූරියගෙන් විමසීම් කෙරිණි. රාජ්‍ය බුද්ධි අංශයේ නව ප්‍රධානී නියෝජ්‍ය පොලිස්පති ප්‍රියන්ත ධම්මික ද සියලු තොරතුරු දැනුම් දෙනු ලැබිණි. 

පෞද්ගලික සොයාබැලීම් අරඹයි

මේ අතර ය, ලංකාවේ ඇමෙරිකානු තානාපති කාර්යාලයෙන් නිවේදනයක් නිකුත් කෙරුණේ. එහි පැහැදිලිව සඳහන් වූයේ ආරුගම්බේ ප්‍රදේශයට ප්‍රහාරයක් එල්ල වීමේ අවදානමක් ඇති බවයි. ඒ අනුව තවත් තානාපති කාර්යාල කිහිපයක් ද මේ නිවේදනය උපුටා දක්වනු ලැබිණි. ජනතාව කලබල වූයේ ඉන්පසුව ය. තානාපති කාර්යාල නිවේදනය නිකුත් කිරීමත් සමග ආණ්ඩුව පාර්ශ්වයෙන් මේ සියලු තානාපති කාර්යාලවලට නිල වශයෙන් දැනුම්දීමක් කෙරිණි. එහි සඳහන් වූයේ අනවශ්‍ය බියක් ඇති කර නොගන්නා ලෙසත්, ආරක්ෂක අංශ අවශ්‍ය සියලු පියවර ගෙන ඇති බවත් ය. ඉන්පසු විදේශ කටයුතු අමාත්‍යංශයට ද දැනුම් දුන්නේ මේ පිළිබඳ නිරන්තරයෙන් තානාපති අංශ දැනුවත් කිරීමට කටයුතු කරන ලෙසයි. 

විදේශ කටයුතු අමාත්‍යංශයේ ලේකම් අරුණි විජේවර්ධන පෞද්ගලිකවම තානාපතිවරුන් අමතමින් මේ කලබලය නතර කිරීමට කටයුතු කළාය. ඒ අතර රජයේ ආරක්ෂක වැඩපිළිවෙල පිළිබඳ සංක්ෂිප්ත වාර්තාවක් ද ඉදිරිපත් කෙරිණි. වැඩේ සාර්ථක විය. තානාපති අංශ පාර්ශ්වයෙන් නොනිල වශයෙන් මෙරටට පැමිණ සිටින සිය රටවල සංචාරකයන්ට දැනුම් දී තිබුණේ හදිසියේ රටින් පිටවීම අවශ්‍ය නැති බවයි. ඊට හේතුවක් ද තිබිණි. ඒ, මේ නිවේදනයෙන් පසු සංචාරක කණ්ඩායම් කිහිපයක් හදිසියේ රටින් පිටවීමට උත්සාහ දැරීමයි. කෙසේ වෙතත් මේ නිවේදනයෙන් පසු එසේ පිටවූ පිරිසක් ද වූහ. ඒ අතර ඊශ්‍රායල ජාතිකයෝ 50කට ආසන්න සංඛ්‍යාවක් ද වූහ.

මේ අතර තවත් වැඩක් සිදු විය. ඒ, ශ්‍රී ලංකා සංචාරක එකමුතුව නිකුත් කළ නිවේදනයකි. මාධ්‍ය වෙත නිකුත් කළ නිවේදනයට අමතරව ඔවුන් තානාපති කාර්යාල වෙත ලිපි කිහිපයක් ද යවා තිබිණි. එහි දක්වා තිබුණේ නිශ්චිත සාක්ෂි නොමැති තත්ත්වයක් තුළ ජනතාව කලබලයට පත්වන පරිදි ප්‍රහාරයක් පිළිබඳ කළ අනතුරු ඇඟවීම සංචාරක කර්මාන්තයට අයහපත් ලෙස බලපානු ඇති බවයි. ඒ ලිපිවල තවත් වැදගත් කරුණක් ද විය. ඒ, ඔස්ටේ්‍රලියානු බුද්ධි අංශ තොරතුරු මත ජර්මනිය නිකුත් කළ නිවේදනයක් ගැන කතාවකි. ජර්මනිය නිකුත් කළ නිවේදනයේ සඳහන් වූයේ ත්‍රස්තවාදීන් ලෝකය පුරා සක්‍රීය ව සිටින නිසා දැඩි අවධානයෙන් සිටින ලෙසයි. 

අද මාතෘකාව මෙන්න

මේ සියල්ලෙන් පසු ජනාධිපතිවරයා පාඩමක් කළේය. එහි මාතෘකාව වූයේ ආණ්ඩු යනු මොනවාද යන්නයි.

‘මීට සති දෙකකට පමණ පෙර අපිට වාර්තා වුණා, ලෝකයේ ඇති වී තිබෙන යුද ගැටුමට සම්බන්ධ දෙයක් ලංකාවෙත් සිදු විය හැකියි කියලා. අපි අදාළ ස්ථානවල වේගයෙන් ආරක්ෂාව තහවුරු කළා. බුද්ධි අංශ තොරතුරු එනකොට අපි මාධ්‍ය සාකච්ඡා තිබ්බෙ නෑ. බුද්ධි අංශ තොරතුරු එනකොට අපේ වගකීම තමයි, ඒ වාර්තාවලට අනුරූපව කටයුතු කරන එක. අපේ වගකීම පුරවැසියන්ගේ ආරක්ෂාව තහවුරු කිරීම. යම් සිදුවීමක් වෙන්න යනව නම්, ඒක වැළැක්වීම තමයි අපේ වගකීම. හැබැයි වෙනදා මොකක්ද වුණේ? ඒ බුද්ධි අංශ තොරතුරු සැලකිල්ලට ගත්තෙ නෑ. එක්කො ඒ තොරතුරුවලින් කලබලයක් නිර්මාණය කළා. අපි අවශ්‍ය වැඩ වේගයෙන් කළා. මතක තියාගන්න, අන්න ඒවට තමයි ආණ්ඩු කියන්නෙ.’

ජනාධිපතිවරයා පුත්තලමේදී පාඩම අවසන් කළේ එසේ ය. 

අධිකරණය ඇතුළේ තවත් අධිකරණයක්

ඡන්දයේ දිනය සම්බන්ධයෙන් ගැටලුවක් මතු කර තිබේ. එය දැන් ඇත්තේ ශ්‍රේෂ්ඨාධිකරණය අතේ ය. පසුගිය බදාදා ශ්‍රේෂ්ඨාධිකරණ සංකීර්ණයේදී මේ ගැන පුළුල් සාකච්ඡාවක් ඇති විය. ඒ, නඩුවේදී විනිසුරුවරුන් ඉදිරියේ නොවේ. ජනාධිපති නීතිඥවරුන්, ආණ්ඩුක්‍රම ව්‍යවස්ථා විශාරදයන් ඇතුළු පිරිසක් අතර ය. ඔවුහු එහිදී පාර්ලිමේන්තු මැතිවරණ පනතේ මැතිවරණ දිනය පිළිබඳ සඳහන් කරුණුත්, ව්‍යවස්ථාවේ ජනතා පරමාධිපත්‍යය පිළිබඳව සඳහන් වන කරුණුත්, ප්‍රායෝගික තත්ත්වයන් සමග සංසන්දනය කළහ.

කිහිපදෙනකුගේ අදහස වූයේ මැතිවරණ දිනය අනිවාර්යෙන්ම වෙනස් කිරීමට සිදු වන බවයි. එහෙත් දීර්ඝ සාකච්ඡාවෙන් පසු සියල්ලන්ගේ අදහස වූයේ එහි ගැටලුවක් නැති බවයි. මේ වෙලාවේ හොඳ ම කතාව කිව්වේ නීතිඥයකු නොවන, එහෙත් නීතිඥයන් සමග සමීප සම්බන්ධකම් පවත්වන දේශපාලනයට ද සම්බන්ධ අයෙකි. ඔහු පැවසුවේ ‘මොනවා වුණත් මිනිස්සුන්ගෙ බලාපොරොත්තුව නම් ඡන්දෙ’ යනුවෙනි. කෙසේ වෙතත් නීතිඥයන් කිව්වේ උසාවිය වැඩ කරන්නේ නීති පොතට අනුව බවයි. 

ජොන්ස්ටන් නීතියට වැඩ

හිටපු ඇමැති ජොන්ස්ටන් ප්‍රනාන්දු දැන් සිටින්නේ රක්ෂිත බන්ධනාගාරයේ ය. ඔහු වැරදිකරුවකු නොවේ. සැකකරුවෙකි. එම නිසා දිනකට තිදෙනකුට ඔහු ව බැලීමට හැකියාව ඇත. එහෙත් රක්ෂිත බන්ධනාගාරයේ සිටි පසුගිය දින කිහිපයේ ම ඔහු බලන්නට ගොස් තිබුණේ එක් අයකු පමණි. හිටපු පාර්ලිමේන්තු මන්ත්‍රීවරුන් කිසිවකු මුල් දින දෙකේදී ඔහු බලන්නට ගොස් තිබුණේ නැත. දැන් කොහොමත් ඔවුන් හිටපු පාර්ලිමේන්තු මන්ත්‍රීවරුන් වන නිසා වරප්‍රසාද නැත. බලන්නට වෙන්නේ පෝලිමේ සිට ය. 

ජොන්ස්ටන් සිකුරාදා උදෑසන වන තෙක් කිසිදු විශේෂ ඉල්ලීමක් බන්ධනාගාර නිලධාරීන්ගෙන් කර තිබුණේ ද නැත. ඔහු රක්ෂිත බන්ධනාගාරයේ පළමු දිනයේ උදේට සම්බෝල සමග බත් ද, දවල්ට මාළු සහ ව්‍යංජන දෙකක් සමග බත් ද, රාත්‍රියට ව්‍යංජන දෙකක් සමග බත් ද ආහාරයට ගෙන තිබිණි. රක්ෂිත බන්ධනාගාරගත කෙරෙන සැකකරුවන්ට අවශ්‍ය නම්, නිවසින් ආහාර ගෙන්වා ගත හැකිය. එහෙත් මෙතෙක් ජොනී එතැනට පැමිණ නැත. ජොනී කර ඇත්තේ වරදක් ද, නැද්ද යන්න අධිකරණය තීන්දු කළ යුතුය. එහෙත් වැදගත් දෙයක් අගය කරන්නට පැකිළිය යුතු නැත. 

ජොන්ස්ටන් සිටින සිර මැඳීරියට බ්‍රහස්පතින්දා දිනයේ ‘විසිටර්’ කෙනකු නැතහොත් අමුත්තකු පැමිණ තිබිණි. බන්ධනාගාරයේ අමුත්තන් පරීක්ෂා කරන ස්ථානයේදී ඒ කාන්තාව ගෙනා විශාල පාර්සලයක් ලිහනු ලැබිණි. එහි තිබුණේ ඌරු මස් ය. බන්ධනාගාර නිලධාරීන් මුලින් සිතා තිබුණේ සියලු රැඳවියන්ට ද සමග ජොන්ස්ටන්ට මේවා ගෙනැවිත් ඇති බවකි. එහෙත් නැත. එහි ඌරු මස්වලට යටින්, කුකුළු මස් ද, ඊට යටින් මත්ද්‍රව්‍යය ද තිබිණි. විසිටර් බන්ධනාගාර නිලධාරීන්ගේ බාරයට ගැනිණි. එතැනින් ඇය බොරැල්ල පොලිසියට යැවිණි. වැදගත් ම දේ විසිටර් පැමිණ තිබුණේ ජොන්ස්ටන් බලන්නට නොවේ. වෙනත් රැඳවියකු බලන්නට ය. එහෙත් ජොන්ස්ටන් බලන්නට පැමිණි විසිටර් කෙනකු ඇල්ලූ බවක් ය, මුලදී බන්ධනාගාරය පුරා පැතිරුණු ආරංචිය වූයේ.

සල්ලි නැතුව වෙච්ච දෙයක්

මැතිවරණ වියදම් පනතට අනුව පැවැති පළමු මැතිවරණය වූයේ පසුගිය ජනාධිපතිවරණයයි. එහිදී වියදම් කළ ආකාරය අපේක්ෂකයන් තිදෙනකු හැර, අනෙක් සියලු අපේක්ෂකයන් මැතිවරණ කොමිසමට බාරදී තිබිණි. කොමිසමෙන් ලබාදී තිබූ ආකාරයට එක් ඡන්දදායකයකු වෙනුවෙන් වැය කළ හැකිව තිබූ උපරිම මුදල වූ රුපියල් ... ක් කිසිවකු වැය කර තිබුණේ නැත. එය එතරම් ම විශාල මුදලකි.

කෙසේ වෙතත් මෙවර පාර්ලිමේන්තු මැතිවරණයේදී ප්‍රචාරක කටයුතු සිදුකරන සමාජ මාධ්‍ය පිටු හිමිකරුවන් ඇතුළු පාර්ශ්ව ගැටලුවකට මුහුණ පා තිබේ. ඒ, අපේක්ෂකයන් සිතූ තරම් වියදම් නොකිරීමයි. ඔවුන් සියලු වැඩ අවම වියදමකින් සිදුකිරීමට උත්සාහ කිරීමයි. එම නිසා සමාජ මාධ්‍ය පිටුවල ප්‍රචාරක වියදම් පළකිරීමේ ගාස්තු ද ජනාධිපතිවරණයට සාපේක්ෂව බාගෙට බාගයකින් අඩු කිරීමට ඔවුන්ට සිදු වී තිබේ. ඊට හේතු වී ඇත්තේ අනාගතයේ ආදායම් ඉපයීම පිළිබඳව ඇති අවිනිශ්චිතතාවක් ද විය හැකිය. 

මේ වැඩේ වැඩියෙන්ම ඇත්තේ සමගි ජන බලවේගයේ අපේක්ෂකයන් අතර ය. ඇතැම් අපේක්ෂකයන් විශාල වියදමක් කරද්දී, තවත් සමහර ජනප්‍රිය අපේක්ෂකයෝ අවම වියදමක් මැතිවරණය වෙනුවෙන් සිදුකරමින් සිටිති. මේ අතර තවත් වැදගත් කරුණක් වන්නේ සමගි ජන බලවේගයේ පැවැති අභ්‍යන්තර ගැටුම් ද මේ වන විට සෑහෙන තරම් සමථයකට පත්වී තිබීමයි. ඒවා සමථ වී ඇත්තේ ද විසඳූම් ලැබීමෙන් නොවේ. ගැටුමට සම්බන්ධ වූ එක් පාර්ශ්වයක් ගැටුම අත්හැරීමෙනි.

සජිත්ගේ කළු වළා පහව යයි

කෙසේ වෙතත් පසුගිය සතියේ සජිත් ප්‍රේමදාසගේ කළු වළාව පහව ගොස් ඇති බව පෙනිණි. ඔහු දිගින්-දිගටම අනෙක් මාතෘකා අත්හැර බඩු මිල ගැන කතා කිරීමට පටන් ගත්තේය. ඔහු අනෙකුත් අපේක්ෂකයන්ට ද උපදෙස් දී තිබුණේ එසේ කරන ලෙසයි. 

‘මේ වෙලාවේ ජනතාවට දැනෙන එක ම දේ බඩු මිල. අපිට කතා කරන්න පුළුවන් හොඳම දේත් බඩු මිල. හොඳට ඉලක්කම් එක්ක ඒ ගැන කතාකරන්න.’

මේ උපදෙසට අනුව පසුගිය සතියේ සමගි ජන බලවේගයේ මාධ්‍ය කටයුතුවල යෙදෙන පිරිසකට වැඩක් පැවරිණි. ඒ, විවිධ ප්‍රදේශවල අත්‍යවශ්‍ය භාණ්ඩ මිල ගණන්, පොල් ඇතුළු හිඟ භාණ්ඩ පිළිබඳ වාර්තාවක් සකස් කරන ලෙසයි. එම වාර්තාව ලබන සඳූදා වන විට සකස් කර බාර දෙන ලෙස ඔවුන්ට උපදෙස් ලැබී තිබේ.

ලන්සා කියයි - ජනතාව අහයි

සිලින්ඩරයේ හෙවත් රනිල් වික්‍රමසිංහ පාර්ශ්වයේ වැඩි වැඩියෙන්ම පෙනෙන්නේ ගම්පහ දිස්ත්‍රික්කයේ ය. නිමල් ලන්සා, නලින් ප්‍රනාන්දු, කෝකිලා ගුණවර්ධන, ලසන්ත අලගියවන්න, මොහොමඩ් නව්ශාඩ් වැනි පිරිස් මේ දිනවල පාරේ ම ය. ප්‍රසන්න රණතුංග ද එහි සිටී. ඔවුන්ගේ සැලසුම වී ඇත්තේ ව්‍යාපාරිකයන් පිරිසක් තමන් ළඟට ගැනීම ය. ඒ වෙනුවෙන් ඔවුහු පෞද්ගලිකව ම ව්‍යාපාරිකයන් මුණගැසෙමින් සිටිති. ඒ අතර ජනාධිපතිවරණයට සහාය දැක්වූ මාලිමාවේ පිරිස් ද සිටී. 

ඔවුන්ගේ ද ප්‍රධාන මාතෘකාව වී ඇත්තේ බඩු මිලයි. 

‘ඔයගොල්ලො මාලිමාවට ඡන්දෙ දුන්නෙ මොනවටද, බඩු මිල අඩු කරගන්න, පඩි වැඩි කරගන්න. දැන් මොකක්ද වෙලා තියෙන්නෙ...?’

ලන්සලා කියන සියල්ල ඔවුහු අසා සිටිති.

‘දැන් ජනතාවත් මේක තේරුම් ගන්න ඕනෙ. අපි එදත් කිව්වා අනුර කුමාරට බෑ කියලා. අදත් කියනවා. ඒත් මිනිස්සු මේක අහන්නෙ නෑ. මහ මැතිවරණය ඉවර වුණාට පස්සෙ හොඳටම තේරෙයි අපි විපක්ෂයේ කාර්යභාරය හොඳට කරගෙන ඉන්නවා.’

ලන්සාගේ මේ කතාවට ගම්පහ එක් ව්‍යාපාරිකයකු ඇසුවේ ‘එතකොට ඔබතුමාලා පිළිගන්නවනෙ මාලිමාව මේ ඡන්දෙත් දිනනවා කියලා’ යනුවෙනි.

ප්‍රසන්න ඊට පිළිතුරු දී තිබිණි. 

‘බලන්නකො ඉස්සරහට වෙන දේවල්.’

‘‍දැන් බලන්න අපේ ආණ්ඩුවෙ වැඩපිළිවෙළ නිසා සංචාරක කර්මාන්තය විශාල වශයෙන් ඉහළ ගියා. ආරුගම්බේ සිද්ධිය නිසා ඒක කඩාකප්පල් වුණා. ආණ්ඩුවෙ ජාතික ආරක්ෂක වැඩපිළිවෙළ ගැන හිතාගන්න පුළුවන්නෙ. ඇමරිකානු තානාපති කාර්යාලය නිවේදනය කරනකම් ම හිටියා ඒ ගැන කියන්න. තව නූලෙන් තවත් පාස්කු ප්‍රහාරයක් වෙන්න තිබ්බා. තානාපති කාර්යාලය ඇලර්ට් එකේ හිටිය නිසා ඒකෙන් බේරුණා.’

කතා කරන්නේ ලන්සා ය. අහගෙන සිටින්නේ ජනතාව ය.